Грамадзянін Беларусі з пісталетам напаў на двух паліцыянтаў у горадзе Обнінск Калужскай вобласці Расеі. Пра гэта паведамляюць расейскія медыі.
«BAZA» адзначае, што мужчына сядзеў за стырном аўтамабіля і відавочна быў п'яны. Калі яго паспрабавалі затрымаць, ён вырваўся і з пісталетам атакаваў паліцыянтаў. Тыя дасталі пісталеты і толькі стрэламі ў паветра змаглі спыніць нападніка.
Паводле інфармацыі «Mash», мужчыну спрабавалі затрымаць працаўнікі дарожна-паставой службы, а сам ён мог быць пад уздзеяннем наркатычных рэчываў. Выданне адзначае, што канфлікт адбыўся ў адным з двароў на вуліцы Паленава, але дэталяў пачатку здарэння не паведамляе.
Сваю версію здарэння прыводзіць ТАСС, спасылаючыся на мясцовую паліцыю. Паводле выдання, да паліцыянтаў звярнуўся мінак і паказаў на мужчыну, які сядзеў у аўтамабілі і меркавана быў пʼяны. Калі праваахоўнікі падышлі да аўтамабіля, з яго выйшаў мужчына, накіраваўшы на іх прадмет, падобны да пісталета, і пачаў ісці на іх. Ён праігнараваў просьбы спыніцца, пасля чаго паліцыянты некалькі разоў стрэлілі ў паветра.
Заяўляецца, што затрыманы – грамадзянін Беларусі. «Mash» удакладняе, што гэта Анатоль П. 1985 года нараджэння. Ён напаў на паліцыянтаў з пнеўматычным пісталетам.
Беларус дастаўлены ў пастарунак. Следства будзе дамагацца ўзяцця яго пад варту. Мужчына падазраецца ва ўчыненні злачынства, прадугледжанага ч. 1 арт. 318 КК РФ («Прымяненне гвалту і пагроза яго прымянення ў дачыненні прадстаўніка ўлады»).
Якуб Хруст belsat.eu
