Кампанія з літоўскім капіталам «Paysera» прыпыніла доступ да рахункаў усіх карыстальнікаў, якія не пацвердзілі свайго легальнага знаходжання на тэрыторыі Еўрапейскага Звязу. Пра гэта паведаміў Валер Кавалеўскі з Агенцтва еўраатлантычнага супрацоўніцтва.
«Сёння "Paysera" без папярэджання паведаміла пра прыпыненне доступу да рахункаў усіх карыстальнікаў, якія не пацвердзілі сваё легальнае знаходжанне на тэрыторыі ЕЗ. Сродкамі нельга карыстацца і кіраваць. Гэта закранае ўсіх беларусаў, хто чакае рашэння аб выдачы ПМЖ, ЧМЖ і іншых формаў легалізацыі. Як вядома, гэты працэс можа цягнуцца вельмі доўга», – адзначыў ён.
Паводле Кавалеўскага, «Paysera» спасылаецца на пастанову ЕЗ ад 24 лютага 2025 года аб увядзенні новых санкцыяў супраць грамадзянаў Беларусі і Расеі.
Нагадаем, што 23 лютага 2022 года «Paysera» абвясціла, што больш не будзе абслугоўваць аперацыяў у расейскіх рублях, закрые рахункі расейскіх і беларускіх кліентаў ды абмяжуе перавод грошай у банкі Беларусі ды Расеі і з іх. «Мы салідарныя з украінцамі і не будзем абслугоўваць практычна ўсіх аперацыяў, звязаных з Расеяй», – заявіў генеральны дырэктар кампаніі Гінтаўтас Мяжаціс.
У верасні 2024 года заяўлялася, што рахункі ў «Paysera» мелі 55 тысячаў беларусаў. Сэрвісам карысталіся ў тым ліку для аплаты рахункаў у Беларусі.
Якуб Хруст belsat.eu
