Віцэ-міністр турызму і спорту Казахстану Ержан Еркінбаеў пракаментаваў інцыдэнт з паліцыянтамі, якія патрабавалі ў аўтаблогера з Беларусі 200 тысяч тэньге (каля $ 400).
«Сапраўды, такі выпадак быў. І гэта не адзіны выпадак – штодня адбываюцца розныя інцыдэнты, звязаныя з паліцыяй або таксоўцамі. Людзей падманваюць, рабуюць», – сказаў віцэ-міністр, паведамляе Tengrinews.kz.
Паводле чыноўніка, Міністэрства спорту і турызму плануе правесці нараду з удзелам паліцыянтаў, памежнікаў і мытнікаў, каб «падняць падобныя пытанні перад імі». Адносна ўзаемадзеяння з паліцыянтамі турыстаў у ведамства «на гэты конт ёсць асобныя планы», сказаў Ержан Еркінбаеў.
Нагадаем, што беларускія турысты выклалі відэа таго, як патрульныя спынілі іх у Туркестанскай вобласці Казахстану. Паводле беларусаў, у іх запатрабавалі 200 тысячаў тэньге за адсутнасць казахскага тэхагляду і траплянне на камеру. Турысты адзначылі, што нічога не парушалі і доказаў ім не далі, але яны «проста заплацілі і паехалі далей».
У дарожнай паліцыі Туркестанскай вобласці пачалі крымінальную справу, а ў дачыненні кіраўніцтва адпаведнага падраздзялення – службовае расследаванне. Апроч таго, вінаватых паліцыянтаў звольнілі.
Якуб Хруст belsat.eu
