Усё больш беларускіх прадпрыемстваў апошнім часам сутыкаюцца з эканамічнымі праблемамі. Не дапамагае ім нават праца на вайсковы комплекс Расеі.
Як паведамляе «Флагшток», у Гомлі на прадпрыемстве «СтанкаГомель», які працуе на расейскую вайсковую прамысловасць, заробкі знізіліся на Br 300–400, а работнікаў пастаянна адпраўляюць у невялікія адпачынкі «за свой кошт» і адгулы «праз сямейныя абставіны». «Але вонкава ўсё ціха і прыгожа – як на могілках», – адзначыла крыніца.
У сваю чаргу «Еўрарадыё» піша, што менскі завод побытавай тэхнікі «Атлант» з 28 красавіка да 12 траўня ідзе ў вытворчы прастой.
Нагадаем, што берасцейскі акумулятарны завод «АйПаўэр» таксама ідзе ў часовы прастой да 12 траўня і скарачае штат працаўнікоў. А МАЗ мае праблемы з экспартам у Расею: у сакавіку ён прадаў там толькі 291 грузавік. Гэта на 42 % менш за аналагічны леташні месяц. Паводле вынікаў кварталу, продаж беларускіх цяжкавікоў у РФ скараціўся на 37 %, да 855 машынаў.
Яшчэ аднаму гомельскаму прадпрыемству, Заводу ліцця і нармаляў (ЗЛіН), што ўваходзіць у склад «Гомсельмашу», давялося браць крэдыт у банку, каб выплаціць заробкі ў пачатку 2025 года.
Якуб Хруст belsat.eu
