Прарасейская даносчыца Вольга Бондарава, якая адбыла арышт за распаўсюд «экстрэмісцкіх матэрыялаў», пракаментавала ў сваім тэлеграм-канале зняволенне і вызваленне.
«У гэтыя дні шмат што праяснілася ў сэнсе, хто ёсць хто. Хачу сказаць дзякуй кожнаму, хто ўзяў удзел у маім лёсе і дапамагаў. Не ведаю, хто рэжысёр тых дзіўных падзеяў, што адбыліся, у супадзенні не веру, асабліва калі іх, гэтых супадзенняў, чарада, як гэтым разам. Мяркую, самае цікавае яшчэ наперадзе, паглядзім на развіццё падзеяў», – заявіла яна.
Знаная праўладная і прарасейская актывістка, даносчыца Вольга Бондарава знікла з публічнай прасторы раніцаю 26 сакавіка. Калі праз два дні яе сталі шукаць журналісты, «Зеркало» даведалася ад суда Маскоўскага раёну сталіцы, што Бондараву асудзілі на 13 дзён арышту. Пазней аўтар праграмы «Шухер-шоу» на «Белсаце» Андрэй Павук дазваніўся да мужа Бондаравай: той пацвердзіў, што актывістка трапіла пад арышт за «распаўсюд экстрэмісцкіх каналаў». 9 красавіка Бондарава сама выпадкова паведаміла Павуку пра вызваленне.
У сеціве беларусы шмат кпілі з арышту актывісткі, якая падтрымлівала масавыя рэпрэсіі. Заснавальнік фонду «BYSOL» Андрэй Стрыжак 1 красавіка сур’ёзна расказаў, пры якіх умовах Бондараву маглі б эвакуяваць з Беларусі. Ды людзі блізкіх ёю поглядаў не заступаліся за даносчыцу ў публічнай сферы.
Бондарава – не адзіная прарасейская актывістка, якая трапіла пад пераслед у сакавіку. З чым звязаная хваля рэпрэсіяў супраць іх, невядома.
Якуб Хруст belsat.eu
