У Стамбуле на тэрыторыі генеральнага консульства Расейскай Федэрацыі 10 красавіка праходзіць чарговы раўнд расейска-амерыканскіх перамоваў, паведамляе ТАСС.
Перамовы праходзяць на ўзроўні дыпламатаў, у закрытым фармаце. Яны прысвечаныя нармалізацыі працы дыпламатычных місіяў.
Расейскую дэлегацыю на перамовах узначальвае амбасадар РФ у ЗША Аляксандр Дарчыеў, амерыканскую – намеснік памочніка дзяржсакратара ў справах Еўропы і Еўразіі Соната Коўлтэр.
Першы раўнд перамоваў Расеі і ЗША пра нармалізацыю працы дыпламатычных місіяў прайшоў 27 лютага. Тады Расея прапанавала ЗША аднавіць прамое авіязлучэнне паміж краінамі.
24 сакавіка перамовы паміж ЗША і Расеяй праходзілі ў сталіцы Саудаўскай Аравіі Эр-Рыядзе, таксама ў закрытым фармаце. Ключавым пытаннем перамоваў быў 30-дзённы мараторый на ўдары ў энергетычную інфраструктуру. Па выніках перамоваў Белы дом паведамляў, што ЗША дамовіліся з Расеяй і Украінай гарантаваць бяспечнае суднаходства, адмовіцца ад ужывання сілы і перадухіліць выкарыстанне камерцыйных судоў у ваенных мэтах у Чорным моры. Таксама была дасягнутая дамоўленасць аб распрацоўванні захадаў для рэалізацыі пагаднення аб забароне ўдараў па энергетычных аб'ектах Расеі і Украіны.
18 лютага ў Эр-Рыядзе таксама праходзілі перамовы расейскай і амерыканскай дэлегацыяў, пасля чаго Доналд Трамп правёў тэлефонныя размовы з Уладзімірам Пуціным і Уладзімірам Зяленскім, абмяркоўваючы частковае спыненне агню. Тады канкрэтныя тэхнічныя параметры замірэння так і не былі ўзгодненыя.
Марыя Міхалевіч belsat.eu
