Суседзі заўважылі адсутнасць спікеркі Каардынацыйнае рады Анжэлікі Мельнікавай прыкладна за тыдзень да таго, як сталася агульнавядома пра яе знікненне. Пра гэта «Белсату» паведамілі крыніцы, якія былі ў доме ў Варшаве, дзе жыла палітык.
Суседзі Анжалікі Мельнікавай адзначылі, што не звярталі на яе шмат увагі, але адна дэталь з жыцця жанчыны была заўважная – яна жыла з мужчынам, якога кожную раніцу можна было заўважыць на прабежцы.
На ягонае знікненне яны звярнулі ўвагу, толькі калі Мельнікаву пачалі шукаць. Суседзі адзначаюць, што і мужчына, і спікерка КР з дзецьмі зніклі прыкладна ў адзін час.
Што гэта за мужчына, дакладна не вядома, але ў медыях ёсць здагадкі, што гэта былы муж Анжалікі Андрэй. Хаця мужчына, які ім назваўся ў размове з «Зеркалом», паведаміў, што не ведае, дзе ягоная былая жонка, бо даўно з ёй не камунікуе. Таксама «Еўрарадыё» ў размове з суседам Мельнікавай даведалася, што нібыта нейкі мужчына, які з ёй жыў, выносіў з кватэры сабраныя рэчы.
Суседзі дадалі крыніцы «Белсату», што складана было б зафіксаваць падазроныя рухі Мельнікавай, бо яна заўсёды дзесьці ездзіла, таму часцяком выходзіла з дому з валізаю.
Крыніца дадае, што спрабавала сачыць за святлом у кватэры Мельнікавай, але на працягу двух дзён пасля таго, як яе пачалі шукаць, нічога не заўважыла.
Пасля знікнення Мельнікавай каля кватэры, дзе яна жыла, былі два ровары ейных непаўналетніх дачок і зімовы абутак.
«Еўрарадыё» 8 красавіка напісала, што каля кватэры заўважаны толькі абутак.
З Анжалікай Мельнікавай няма сувязі з 25 сакавіка. 7 красавіка ейны былы муж пацвердзіў, што іхныя непаўналетнія дочкі цяпер разам з ім на тэрыторыі Беларусі.
Каардынацыйная рада 8 красавіка паведаміла, што было зафіксаванае знаходжанне тэлефону Мельнікавай у Менску 19 сакавіка, а 13 сакавіка з ейнага акаўнту былі спампаваныя файлы, што датычаць працы Каардынацыйнае рады.
Дар'я Форман, Арсен Рудэнка belsat.eu
