Польскія мытнікі ўслед за памежнікамі зняпраўдзілі інфармацыю пра перавоз праз пункт пропуску ў Тэрэспалі буйной партыі выбухоўкі. У палаце падатковага адміністравання ў Любліне заявілі «Белсату», што звесткі, якія распаўсюджваюць беларускія службы, – гэта «прапагандысцкія высілкі рэжыму».
«Нацыянальная падатковая адміністрацыя Польшчы не пацвярджае інцыдэнту з вывазам з Польшчы ў Беларусь 580 кг выбуховых рэчываў», – заявіў «Белсату» прэс-сакратар палаты падатковага адміністравання ў Любліне Міхал Дэрусь. Гэтая ўстанова адказвае за працу мытнікаў у пункце пропуску ў Тэрэспалі на мяжы з Беларуссю.
,,«Паведамленне беларускай мытнай службы – частка прапагандысцкіх высілкаў рэжыму. Нацыянальная падатковая адміністрацыя прымае ўсе неабходныя захады для гарантавання бяспекі і эфектыўнага кантролю на мяжы».
Пра тое, што Менск распаўсюджвае дэзынфармацыю, у каментары «Белсату» адзначыў і спікер Надбужанскага аддзелу Памежнай аховы Польшчы, да якога належыць пераход у Тэрэспалі, Дар'юш Сеніцкі.
,,«Мы не каментуем матэрыялаў, што публікуюць службы Беларусі, разглядаючы іх як элементы дэзынфармацыі».
Пра затрыманне «найбуйнейшай у гісторыі Беларусі» партыі выбухоўкі, што спрабавалі прывезці з Польшчы, беларуская мытня заявіла 6 красавіка. Паводле версіі прапагандыстаў, мікрааўтобус з небяспечным грузам меўся трапіць у Расею.
За стырном быў 41-гадовы грамадзянін Беларусі Яўген Манько. Дзяржаўнаму тэлебачанню ён сказаў, што пра «нашпігаванне» салону не ведаў і што яго выкарысталі ўцёмную. Паводле мужчыны, перавезці гэты мікрааўтобус яго папрасіў знаёмец з Эстоніі Раман, а таму машыну перадаў нейкі Іван, які перарабіў аўта пад аўтадом.
Манько нарадзіўся ў Львове, і на гэты факт у каментары «Белсату» звярнуў увагу прадстаўнік арганізацыі «BELPOL» Уладзімір Жыгар:
«Часта бывае, што ўкраінцаў могуць падставіць, іх могуць неяк дыскрэдытаваць. І ў прынцыпе рэжыму не важны лёс асобы, ейная будучыня. Аднак гэта неблагі такі кейс для гандлю, для пэўных узаемадзеянняў з украінскім бокам».
Жыгар таксама падкрэсліў, што фігуранта справы занадта хутка паказалі ў эфіры, і такая публічнасць падазраванага магла б нашкодзіць следству, калі б яно вялося належным чынам:
,,«Уявім, што ён насамрэч перавозіў выбуховыя рэчывы. Не варта яго паказваць, бо неабходна правесці аператыўныя захады, каб зразумець, хто датычны, куды гэта везлі, навошта. А адразу паказаць чалавека па дзяржаўным тэлебачанні – гэта закрыць сабе шлях для расследавання злачынства, калі яно насамрэч было».
Прадстаўнік «BELPOL» не схільны давяраць версіі, што распаўсюджвае Менск:
«Калі пра гэта кажа рэжым Лукашэнкі, то цяжка паверыць у тое, што гэта можа быць праўдаю. Мы ведаем, як яны прарывалі мяжу самыя, дохлыя пацукі ў вядры, нейкія вялікія сховішчы са зброяй у 2010 годзе... Верыць у гэта, мякка кажучы, цяжка».
У 2017 годзе ў Беларусь праз мяжу з Украінаю нібыта прарываўся джып з арсеналам. «BELPOL» неўзабаве высветліў, што за стырном машыны быў супрацоўнік цэнтральнага апарата КДБ Сяргей Балобін.
Дар'я Форман belsat.eu
