Жонку сярэдняга сына Аляксандра Лукашэнкі Дзмітрыя Ганну, таксама вядомую пад творчым псеўданімам як Ганна Сялук, ніяк не могуць дадаць у санкцыйныя спісы Еўразвязу. Прычыны гэтага даведалася «Бюро».
У чорным спісе ЕЗ ужо ёсць Аляксандр Лукашэнка, ягоныя сыны Віктар ды Дзмітрый і нявестка Лілія. У 2024 годзе Літва прапаноўвала ўнесці ў яго і Ганну Лукашэнку, але яе кандыдатуру заблакавала Славаччына, паведамляе «Бюро» са спасылкай на тры не звязаныя адна з адной крыніцы ў палітычным, дыпламатычным і праваабарончым колах.
У літоўскім і славацкім міністэрствах замежных справаў не пацвердзілі, але і не зняпраўдзілі гэтай інфармацыі.
Цяперашні прэм’ер-міністр Славаччыны Робэрт Фіца выступае за нармалізацыю адносінаў з Расеяй і Беларуссю ды падтрымлівае кантакты з афіцыйным Менскам.
Ганна Лукашэнка найбольш вядомая тым, што піша песні пад псеўданімам Ганна Сялук. Сярод ейных «гітоў», што круцяць на дзяржаўным радыё і тэлебачанні: «Ах, Аляксандр» (відавочна, прысвечаны цесцю), «Беларусская жена», «Бульба-дэнс», «Цените настоящего мужчину», гімн Генеральнай пракуратуры і песня пра Год якасці. У снежні 2023 года Лукашэнка ўзнагародзіў Ганну прэміяй «за вялікі асабісты ўнёсак у развіццё сучаснага музычнага мастацтва, рэалізацыю сацыяльна значных культурных ініцыятываў». А летась яна атрымала прэмію «Шансон года – 2024» ад расейскай радыёстанцыі «Шансон», заснаванай сябрам Лукашэнкі, алігархам Міхаілам Гуцэрыевым.
Ганна Лукашэнка як мінімум у 2018 і ў 2020 гадах працавала ў Гандлёвым доме БелАЗ, дзяржаўным манапольным дылеры жодзінскай тэхнікі ў Расеі. Яго сузаснавальнік – Прэзідэнцкі спартовы клуб, якім кіруе ейны муж Дзмітрый Лукашэнка. Прадукцыю ён рэалізоўвае праз прыватныя кампаніі жонак сваіх менеджараў, звязаных з Ганнай. Прыбыткі гэтых кампаніяў параўнальныя з прыбыткам самога БелАЗу. Толькі за 2023 год іх уладальнікі выплацілі сабе больш як $ 31 млн дывідэндаў.
У 2024 годзе Сялук сталася галоўнай у правядзенні перадвыбарчага агітацыйнага «Марафону адзінства».
Якуб Хруст belsat.eu
