Рынак новых грузавых аўтамабіляў у Расеі ў сакавіку 2025 года працягнуў рэзкае зніжэнне. Пра гэта сведчаць звесткі аналітычнага агенцтва «Автостат Инфо».
Продажы новых грузавікоў у РФ скараціліся за год на 56 %, склаўшы толькі 5158 адзінак супраць 11 641 у сакавіку 2024 года. Адносна лютага 2025 года продажы ўпалі на 9 %.
За першы квартал 2025 года сукупны аб'ём продажаў грузавікоў у РФ зменшыўся на 27 % год да года, дасягнуўшы 16 603 адзінак супраць 29 776 за аналагічны перыяд 2024 года. Пры гэтым сакавіцкія продажы сталіся найніжэйшымі ў квартале.
Доля імпартных грузавікоў скарацілася са 69 % да 49 % у гадавым супастаўленні. Продажы імпартных легкавікоў абрынуліся на 69 % (з 8059 да 2534 адзінак), тады як рэалізацыя расейскіх машынаў знізілася толькі на 27 % (з 3582 да 2624 адзінак). Найбольш пацярпеў брэнд «Sitrak», які зафіксаваў абвал на 77 % (515 адзінак супраць 2193 годам раней).
Беларускі МАЗ у сакавіку прадаў у Расеі толькі 291 грузавік. Гэта на 42 % менш, чым за аналагічны леташні месяц. Паводле вынікаў квартала продаж беларускіх грузавікоў у РФ скараціўся на 37 %, да 855 машынаў.
Нагадаем, што МАЗ – не адзінае беларускае прадпрыемства, што мае сур’ёзныя праблемы. Гэтак, берасцейскі акумулятарны завод «АйПаўэр» ідзе ў часовы прастой да 12 траўня і скарачае штат працаўнікоў.
Якуб Хруст belsat.eu
