За ноч колькасць паселішчаў у Беларусі, якія засталіся без электразабеспячэння, вырасла ў 2,5 разы. Калі ўвечары 6 красавіка без святла былі толькі 19 населеных пунктаў, то раніцаю 7 красавіка іх стала ўжо 47, паведамляе Мінэнерга.
Асабліва моцна пацярпела Магілёўская вобласць: паводле «Магілёўэнерга», 46 паселішчаў на тэрыторыі Асіповіцкага, Кіраўскага, Бабруйскага і Магілёўскага раёнаў застаюцца без электрычнасці.
Раней Мінэнерга адзначала, што агульная колькасць паселішчаў, дзе былі праблемы з электразабеспячэннем праз стыхію, перавышала 650.
«Белгідрамет» працягвае папярэджваць пра аранжавы ўзровень небяспекі на 7 красавіка. Ва ўсходніх рэгіёнах прагназуюць моцны снегапад, а ўдзень на большай частцы краіны, у тым ліку ў Менску, чакаюцца парывы паўночнага ветру хуткасцю да 18 м/с.
Нагадаем: у ноч на 6 красавіка на Магілёўшчыне і Меншчыне непагадзь з моцным ветрам, дажджом і мокрым снегам прывяла да масавых адлучэнняў электрычнасці.
Паводле інфармацыі «Магілёўэнерга», раніцаю 6 красавіка без святла заставаліся 142 паселішчаў, пераважна ў Бабруйскім, Асіповіцкім, Кіраўскім і Магілёўскім раёнах.
Для аднаўлення электразабеспячэння былі задзеяныя 49 брыгадаў і 55 адзінак тэхнікі.
Надзея Вольная / belsat.eu
