Праз нечаканы снегу птушкі разгублена шукаюць ежу. Адмыслоўцы заклікаюць дапамагчы буслам перажыць халодны перыяд.
Раніца 5 красавіка сталася халоднаю неспадзяванкаю для жыхароў Маладзечаншчыны: нечаканы красавіцкі снег заспеў знянацку не толькі людзей, але і птушак. Каля Маладзечна заўважылі буслоў, якія ў заснежаных вясковых дварах разгублена шукалі ежу.
Фотаздымкі белых птушак, якія блукаюць паміж заснежанымі кветнікамі і сцежкамі, распаўсюджваюцца ў сацыяльных сетках. Людзі занепакоеныя лёсам буслоў, якія вярнуліся ў Беларусь пасля зімоўкі ў больш цёплых краінах і апынуліся ў неспрыяльных умовах.
Як дапамагчы буслам?
Адмыслоўцы рэкамендуюць падкормліваць буслоў рыбаю, сырым несалёным мясам або дробнымі кавалачкамі печані. Ежу лепш выкладваць у адкрытых месцах, далей ад дарог і людзей.
Да якога надвор'я рыхтавацца 7 красавіка
Нагадаем: 5 красавіка 2025 года на Беларусь абрынуліся моцныя снегапады. У прыватнасці, у Менску і Менскай вобласці назіраліся завіруха, снег і град. Снег таксама выпаў у астатніх вобласцях краіны. Сіноптыкі абвясцілі аранжавы ўзровень небяспекі праз рэзкую змену надворʼя і ўзмацненне ветру. Па ўсёй краіне 6 красавіка чакаецца снег і мокры снег, а таксама начныя замаразкі.
Паводле прагнозаў, на панядзелак, 7 красавіка, у Беларусі чакаецца халоднае надворʼе з тэмператураю паветра ад -1 да +4°C. Магчымы снег і мокры снег, а таксама парывісты вецер. Сіноптыкі рэкамендуюць быць уважлівымі на дарогах і цёпла апранацца.
Надзея Вольная / belsat.eu
