Да маці былога палітзняволенага праваабаронцы Леаніда Судаленкі прыходзілі сілавікі. Пра гэта паведаміў сам Судаленка. Праваабаронца нават за кратамі хаваў ад маці, дзе ён, каб не хваляваць яе.
Леанід Судаленка цяпер за мяжой, ён актыўна вядзе сацсеткі і публічную дзейнасць. Аднак сілавікі прыйшлі ў дом ягонай маці, нібыта шукаць праваабаронцу.
«Прымусілі 87-гадовую жанчыну падпісаць пратакол пра маю адсутнасць у доме, які я пакінуў яшчэ ў час СССР. Яны ведаюць, дзе я, – і ўсё роўна прыйшлі! Ім абыякавы яе ўзрост, здароўе, сэрца. Яны прыйшлі, каб зламаць. Каб учыніць боль. Каб сказаць: «Твой сын – злачынец. Ён у вышуку», – піша Леанід Судаленка на сваёй старонцы ў Facebook.
Ён падкрэслівае, што нават за кратамі хаваў ад маці, што быў у няволі.
«Казаў, што працую за мяжой. Бярог яе здароўе. Пасля вызвалення паспеў развітацца з ёю назаўсёды. Але і тады не сказаў праўду – проста паўтарыў: "Паехаў працаваць за мяжу".
А нядаўна, віншуючы з днём нараджэння, пачуў: "Сынок, калі ты да мяне прыедзеш?" Я не змог яе раніць. Адказаў: "Восенню, мама. Абавязкова прыеду". Хоць дакладна ведаю: хутчэй за ўсё, не атрымаецца...
І сёння я зноў кажу табе, мама: калі дарога прывядзе мяне дадому – я прыеду да цябе з вялікім букетам кветак. Без затрымкі. Адразу. Ты са мной кожны дзень. У маім сэрцы. У маіх думках. У маёй памяці», – піша Судаленка.
Тым, хто ўварваўся ў ягоны дом, праваабаронца кажа: жывіце і бойцеся.
«Вам – гора. Бо вочы страху цяпер, гэта ўжо не вочы маёй маці. Страх цяпер – у вашых вачах!» – падводзіць рысу праваабаронца.
Арсен Рудэнка belsat.eu
