Максіма Урбановіча, затрыманага 2 красавіка, не выпусцілі на волю. Яго ўтрымліваюць у камеры СІЗА КДБ, паведамляюць крыніцы «Белсату».
У ноч на 6 красавіка скончыліся трое содняў, падчас якіх Максіма Урбановіча, згодна з Крымінальна-працэсуальным кодэксам Беларусі, маглі трымаць без выстаўлення абвінавачання на час правярання. Максім на волю не выйшаў, цяпер ён у СІЗА КДБ, паведамляюць крыніцы «Белсату». Гэта дае падставы меркаваць, што следчыя арыштавалі мужчыну яшчэ як мінімум на 10 дзён. Невядома, ці распачатая крымінальная справа і ў якім статусе трымаюць Максіма Урбановіча пад вартаю.
Нагадаем, што Максіма Урбановіча затрымалі 2 красавіка. Працаўнікі КДБ уварваліся ў кватэру, дзе ён жыў з дзяўчынай. У іхным пакоі ўчынілі ператрус. Працаўнікі КДБ забралі ўсе носьбіты інфармацыі. Пра акалічнасці справы амаль нічога невядома, як не вядомыя і прычыны затрымання Максіма.
Ягоны брат Дзяніс Урбановіч – лідар «Маладога фронту», арганізацыі, прызнанай уладамі Беларусі экстрэмісцкім фармаваннем. Апроч таго, Дзяніс пад пазыўным Ваўкалак ваюе ў шэрагах ЗСУ з самога пачатку поўнамаштабнага ўварвання расейскіх войскаў ва Украіну. Дзяніс Урбановіч даўно не мае ніякіх стасункаў з братам і пра затрыманне яго нічога не ведаў.
