У ноч з 5 на 6 красавіка на Магілёўшчыне і Меншчыне непагадзь з моцным ветрам, дажджом і мокрым снегам прывяла да масавых адключэнняў электрычнасці.
Паводле інфармацыі «Магілёўэнерга», раніцай 6 красавіка без святла заставаліся 142 населеныя пункты, пераважна ў Бабруйскім, Асіповіцкім, Кіраўскім і Магілёўскім раёнах.
Для аднаўлення электразабеспячэння задзейнічалі 49 брыгадаў і 55 адзінак тэхнікі.
Паводле энергетыкаў «Менскэнерга», цяпер ідзе актыўная праца для ўзнаўлення электразабеспячэння ў больш як 130 паселішчах. Найбольш пацярпелі Пухавіцкі і Слуцкі раёны.
У сталіцы снег прыбіраюць больш за 70 машынаў спецтэхнікі.
Сіноптыкі прагназуюць на 6 красавіка воблачнае надвор’е з праясненнямі, снег, дождж, завеі і галалёд у асобных рэгіёнах. У Менску істотных ападкаў не чакаецца, але магчымы галалёд на дарогах, тэмпература ўдзень – каля 0..+2°C.
У той жа час Белгідрамет выдаў папярэджанне пра неспрыяльныя гідраметэаралагічныя з’явы (аранжавы ўзровень) і ўзмацненне на большай частцы тэрыторыі краіны ветру з парывамі да 15–20 м/с. У паўднёва-ўсходняй частцы Беларусі – моцны мокры снег, завіруха.
Раман Шавель belsat.eu
