У прарывах мяжы мігрантамі з’явіліся новыя акалічнасці. Пакуль частка нелегалаў прарываецца праз агароджу, іхныя дзеянні запісваюць на камеры з беларускага боку нейкія людзі. Верагодна, у прапагандысцкіх мэтах.
На гэта звярнуў увагу прэс-сакратар польскага Міністэрства ўнутраных справаў і адміністрацыі Яцэк Дабжыньскі.
Ён адзначыў, што апошнім часам назіраецца рост колькасці іншаземцаў, якія спрабуюць перайсці мяжу.
,,«Учора група з 22 асобаў, разбураючы тэхнічную загароду, пранікла ў Польшчу. Новым элементам ёсць тое, што 5 асобаў засталіся на беларускім баку, кідаючы камяні ў польскія патрулі, і запісвалі пры гэтым нелегальны пераход мяжы», – адзначыў Дабжыньскі.
Сапраўды, на відэа, выкладзеным Памежнай аховай, можна ўбачыць, як з дапамогай спецсродкаў мігранты праразаюць лаз у агароджы.
Дабжыньскі не выключыў, што гэтыя відэа будуць выкарыстаныя для прапаганды, што вядзецца беларускім бокам і арганізатарамі працэсу міграцыі, нібыта мяжу з Польшчай можна лёгка пераадолець.
,,«Аднак насамрэч спробы нелегальнага пераходу мяжы, як гэта відаць на запісах маніторынгу, хутка і эфектыўна спыняюцца. Праходу няма. Польская мяжа герметычная. Тысячы жаўнераў, памежнікаў і паліцыянтаў, камеры і дроны сочаць за кожным метрам цягам 24 гадзінаў на содні», – адзначыў Яцэк Дабжыньскі.
Адсочваць сітуацыю на мяжы, са словаў прэс-сакратара МУС, дапамагае электронны бар’ер, дзякуючы яму кожны падыход да агароджы, а тым больш спробы нелегальнага пераходу мяжы неадкладна выяўляюцца.
Дабжыньскі звярнуў увагу таксама на тое, што апошнім часам колькасць спробаў нелегальнага пераходу беларуска-польскай мяжы павялічылася.
Сапраўды, «Белсат» ужо звяртаў увагу на тое, што апошнімі днямі колькасць нелегальных мігрантаў істотна вырасла. За тыдзень, з пятніцы 28 сакавіка да 4 красавіка, было зафіксавана больш за тысячу выпадкаў прарыву. Тэндэнцыя на павелічэнне выразна прасочваецца з пачатку 2025 года, асабліва пасля правядзення так званых выбараў у Беларусі.
Абсалютную большасць з іх памежным службам удалося спыніць. У той жа час адзначаецца, што мігранты паводзяцца агрэсіўна і кідаюць у памежнікаў камяні.
Раман Шавель belsat.eu
