У нядзелю, 6 красавіка, у Варшаве пройдзе цырымонія развітання з Максімам Чарняўскім, які пайшоў з жыцця ў сярэдзіне сакавіка.
Развітанне пачнецца а 13:00 на адрасе: ul. Nowogrodzka, 51, Memento Mori, Варшава.
,,«Запрашаем вас на цырымонію развітання з Максам, каб разам ушанаваць яго памяць і аддаць даніну павагі ягонаму яскраваму жыццю. Улічваючы, якім асаблівым быў Макс, просім у гэты дзень прыйсці ў адзенні яркіх колераў – сімвалаў радасці, светлых успамінаў і цеплыні, якую ён пакінуў пасля сябе. Калі ў вас ёсць фотаздымкі з Максам, лісты або гісторыі, звязаныя з ім, мы будзем удзячныя, калі вы возьмеце іх з сабой або падзеліцеся з прысутнымі. Таксама будзем удзячныя за кветкі, асабліва палявыя, якія найлепш перададуць светлы і радасны дух гэтага дня», – пішуць арганізатары цырымоніі.
Максім Чарняўскі здзейсніў суіцыд на 33-м годзе жыцця. У 2010-х гадах мужчына быў вядомы як заснавальнік пабліку «Надоел нам этот Лукашенко» і сайту gonzo.by у 2010-х гадах. Да самагубства беларуса падштурхнулі сямейныя праблемы, пісала «Наша Ніва».
Увечары 14 сакавіка Чарняўскі апублікаваў свой апошні пост у «Фэйсбуку», пасля чаго перастаў выходзіць на сувязь. У допісе беларус казаў, што вельмі любіць сваіх дачок, і прасіў у іх прабачэння.
У 2011 годзе, калі ён яшчэ быў студэнтам Інстытуту журналістыкі БДУ, хлопец распавядаў, што яго спрабаваў вербаваць КДБ, пасля чаго ён з’ехаў у Польшчу, дзе працягнуў навучанне. Атрымаў адукацыю ў ІТ, апошнім часам працаваў у польскай страхавой кампаніі.
У другім шлюбе ў Максіма нарадзіліся блізняты – дзве дачкі.
Марыя Міхалевіч belsat.eu
