Падчас прыёмнай кампаніі 2025 года Беларускі дзяржаўны ўніверсітэт плануе скараціць колькасць месцаў на платнай форме навучання, паведаміў рэктар навучальнай установы Андрэй Кароль.
Скарачэнне платных месцаў закране як дзённую, так і завочную форму навучання.
,,«Гэта адна са стратэгіяў ВНУ. І рэакцыя на запыт дзяржавы: сёлета колькасць бюджэтных месцаў вырасце на 19. У 2024 годзе гэты прырост склаў 400», – распавёў рэктар.
Агулам БДУ плануе прыняць сёлета на праграмы агульнай і спецыяльнай вышэйшай адукацыі 4193 студэнтаў (у 2024 прынялі 4408 чалавек). У гэтую лічбу не ўваходзіць план прыёму на вайсковы факультэт, які яшчэ не зацверджаны.
На дзённую бюджэтную форму прымуць 2538 студэнтаў (у 2024-м – 2519), на завочную бюджэтную – 112 (у 2024-м – 104).
На платную дзённую форму навучання план набору складзе 1401 студэнт (у 2024-м – 1509), на завочную – 142 (у 2024-м – 276), на завочную для атрымання другой вышэйшай адукацыі – 50 (летась – 103).
Акрамя таго, у беларускіх ВНУ ў рамках аптымізацыі падрыхтоўкі спецыялістаў сёлета закрыюць 45 спецыяльнасцяў, распавядаў міністр адукацыі Беларусі Андрэй Іванец.
Агулам у 2025 годзе ВНУ Беларусі гатовыя прыняць 48,3 тысячы абітурыентаў. На платнае навучанне ў 2025 годзе лічбы прыёму зніжаныя на 2,7 тысячы месцаў і складаюць 16,5 тысячы. На бюджэт жа колькасць месцаў у параўнанні з папярэднім годам вырасла на 400 – да 31,8 тысячы.
Марыя Міхалевіч belsat.eu
