Позна ўвечары 4 красавіка расейскія войскі другі раз за дзень ударылі па ўкраінскім Крывым Розе. Агульная колькасць загінулых у выніку абстрэлаў паводле стану на раніцу 5 красавіка вырасла да 19 чалавек.
Беспілотнікі атакавалі прыватны сектар гораду. У выніку налёту загарэўся адзін з дамоў, у ім загінула 56-гадовая жанчына. Пяць чалавек атрымалі раненні, паведаміў кіраўнік рады абароны Крывога Рогу Аляксандр Вілкул.
Дроны таксама перабілі рэйкі і кантактную сетку ў горадзе.
Папярэдні ўдар па Крывым Розе адбыўся каля 19-й гадзіны 4 красавіка: балістычныя ракеты трапілі ў жылы раён, побач з дзіцячай пляцоўкай. Загінулі 18 чалавек, з іх дзевяць – дзеці.
Аляксандр Вілкул пісаў, што расейскія вайскоўцы «ўдарылі балістычнай ракетай у цэнтр жылога мікрараёну, побач з дзіцячай пляцоўкай». Паводле яго, «ракета выбухнула ў паветры – спецыяльна, каб больш людзей пацярпела».
Міністэрства абароны Расеі пацвердзіла ракетны ўдар, аднак сцвярджае, што ён быў нанесены «па месцы правядзення нарады з камандзірамі злучэнняў і заходнімі інструктарамі ў адным з рэстаранаў Крывога Рогу».
Генштаб ЗСУ назваў гэтую заяву хлуснёй і зазначыў, што ракета «Іскандэр-М» трапіла ў «жылы масіў і дзіцячую пляцоўку».
Агулам у выніку ракетнай і дронавай атак загінулі 19 чалавек. Пацярпелі 68 чалавек, у тым ліку трохмесячнае немаўля. Самы старэйшы пацярпелы мае 68 гадоў. 40 чалавек застаюцца ў лякарнях. Двое дзяцей – у веку пяці і васьмі гадоў – былі перавезеныя ў лякарню Дняпра ў крайне цяжкім стане.
У лякарнях Крывога Рогу застаюцца 17 параненых, з іх двое дзяцей у цяжкім стане.
У выніку ўдараў былі пашкоджаныя 34 шматкватэрныя дамы, шэсць навучальных установаў, крамы, аб’екты бізнесу і інфраструктуры, аўтамабілі, прыватны дом.
Марыя Міхалевіч belsat.eu
