Расейскія войскі збіраюцца каля Данецкай вобласці і рыхтуюцца да маштабнага наступу, паведамляе Інстытут вывучэння вайны (ISW).
Расея пашырае свой плацдарм на паўночны ўсход ад Ліману і стварае ўмовы для захопу Баравой і Ліману найбліжэйшымі месяцамі. Паводле справаздачы ISW, расейскае камандаванне з дапамогаю тактыкі «чалавечых хваляў» спрабуе выцесніць украінскія сілы, аднак, у той жа час, на думку даследнікаў, адсутнасць механізаваных атакаў сведчыць пра праблемы расейцаў з тэхнікаю. Агулам расейцы ўзмацнілі пяхотныя атакі і зменшылі выкарыстанне бранятэхнікі ад пачатку 2025 года.
На цяперашні момант расейскія войскі прасунуліся на паўночны захад ад Навалюбаўкі і верагодна захапілі гэтае паселішча, адзначае ISW. Пры гэтым, паводле звестак аўтараў справаздачы, на асобных участках суадносіны сілаў дасягаюць 10:1 на карысць РФ. Расея актыўна папаўняе страты і пры гэтым не выводзіць падраздзяленні на адпачынак.
Паводле аналітыкаў ISW, расейскія войскі могуць захапіць той адзін адсотак Луганскай вобласці, што яшчэ застаецца пад кантролем Украіны, каб узмацніць пазіцыі Расеі на перамовах.
Прэзідэнт Украіны Уладзімір Зяленскі раней заяўляў, што Расея рыхтуе наступ на яшчэ дзве ўкраінскія вобласці – Сумскую і Харкаўскую, і выведка пацвярджае гэтую інфармацыю.
У ноч з 1 на 2 красавіка Харкаў быў масавана абстраляны расейскімі дронамі. Удары наносілі 15 беспілотнікаў. Пацярпелі восем чалавек, сярод іх – двое дзяцей.
1 красавіка ў Расеі распачаўся веснавы набор у войска, што зробіцца найбольш маштабным за апошнія 14 гадоў – плануецца набор 160 тысячаў чалавек. Кампанія будзе трываць тры з паловаю месяца (з 1 красавіка да 15 ліпеня) і закране мужчынаў ва ўзросце ад 18 да 30 гадоў.
Марыя Міхалевіч belsat.eu
