Зніклую спікерку Каардынацыйнай рады працягваюць шукаць, але пакуль ёсць толькі версіі і здагадкі, расказала выканальніца абавязкаў спікеркі на паседжанні КР.
Выканальніца абавязкаў спікеркі Каардынацыйнай рады Стася Гліннік расказала на паседжанні Каардынацыйнай рады 1 красавіка, што пошукі зніклай спікеркі КР Анжалікі Мельнікавай трываюць. Са спасылкаю на польскія праваахоўныя органы Гліннік паведаміла: вынікаў пошукі пакуль не прынеслі. Апошні тэкставы кантакт з Мельнікаваю быў раніцаю 25 сакавіка. Што з ёй з таго часу, невядома.
30 сакавіка правяла сваё першае паседжанне працоўная група КР у справе рэагавання і маніторынгу, групу ўзначаліў Аляксандр Паршанкоў. Яна распрацоўвае ўсе магчымыя сцэнары падзеяў і рэагавання на іх, публікуе справаздачы для КР у закрытым канале. Група сярод іншага адзначыла неабходнасць удасканаліць механізм фінансавання КР, тэму фінансавання асобна разгледзяць 2 красавіка на паседжанні фракцыяў КР.
,,«Усе версіі застаюцца версіямі і здагадкамі», – падкрэсліла Гліннік.
Паводле яе, запыт на інфармацыю пра Мельнікаву ёсць і ў грамадства, і ў КР, але версіі пакуль не падмацаваныя фактамі. Яна заклікала іншых не распаўсюджваць непацверджанай інфармацыі.
Пра знікненне спікеркі Каардынацыйнай рады Анжалікі Мельнікавай ейныя сябры паведамілі ўвечары 28 сакавіка. 29 красавіка Гліннік расказвала, што версіяў знікнення Мельнікавай шмат: ад выкрадання і вербавання да дэпрэсіі.
Кіраўнік Народнага антыкрызіснага ўпраўлення Павел Латушка 29 сакавіка расказаў, што былы муж Мельнікавай выехаў у Беларусь, а 31 сакавіка паведаміў, што мабільны тэлефон Мельнікавай з 19 сакавіка фіксуецца на тэрыторыі Беларусі.
Прадстаўніца «Кіберпартызанаў» Юліяна Шаметавец запэўніла «Белсат», што на працу арганізацыі амаль не паўплывае адсутнасць доступу да рахункаў кампаніі зніклай Анжалікі Мельнікавай. Там завіслі некалькі дзясяткаў тысяч долараў, якія донары вылучылі «Кіберпартызанам».
Алесь Наваборскі belsat.eu
