Амерыканец, які ўцёк у Беларусь, не звязаны з загінулымі ў Літве вайскоўцамі ЗША

У ведамстве адзначылі, што ва ўцёках амерыканца няма нічога агульнага з падзеямі на палігоне ў Падброддзі. У Літве некалькі тыдняў грамадзянін ЗША перабываў законна. Памежнікі 26 сакавіка размаўлялі з ім на мяжы з Расеяй, на вакзале ў Кібартаі, а 27 і 30 сакавіка на мяжы з Беларуссю, каля вакзалу ў Кяне, перадае «Delfi».

Свае звесткі пра амерыканца даў і Дзяржаўны мытны камітэт Беларусі. Там адзначылі, што той 24 сакавіка двойчы спрабаваў заехаць на беларускую тэрыторыю праз пункты пропуску «Каменны Лог» і «Беняконі». Аднак падчас памежнага кантролю не змог пацвердзіць наяўнасць сродкаў, неабходных для пакрыцця расходаў для перабывання ў Рэспубліцы Беларусь і выезду з нашай краіны, у сувязі з чым яму адмовілі ў заездзе. Пасля прыцягнення да адміністратыўнай адказнасці правапарушальнік будзе дэпартаваны ў Літву, заявілі ў ведамстве.

Нагадаем, што амерыканскія вайскоўцы ў гусенічнай браняванай машыне M88 зніклі 25 сакавіка падчас вучэнняў на палігоне ў Падброддзі. Наступным днём стала вядома, што машына затанула ў балоце. Яна была на глыбіні 4 метраў, над ёю было 2 метры глею. Раніцаю 31 сакавіка ратавальнікам удалося дастаць з балота машыну. Пры гэтым у ёй былі знойдзеныя целы толькі трох з чатырох зніклых вайскоўцаў. Пошукі чацвёртага працягваюцца. Прэзідэнт ЗША заявіў, што машына магла праваліцца пад лёд, якога, аднак, там не было.

Пры гэтым у беларускім Маладзечне 31 сакавіка затрымалі грамадзяніна ЗША, якога знайшлі ў парожнім вагоне цягніка. Ягоны век быў падобны да таго, што мае зніклы вайсковец ЗША.

Якуб Хруст belsat.eu