Відэа турыстаў з Беларусі, якія сцвярджаюць, што казахскія паліцыянты запатрабавалі з іх 200 тыс. тэньге (каля 400 долараў), выклікала скандал у Казахстане.
Беларускія турысты выклалі відэа таго, як патрульныя спынілі іх у Туркестанскай вобласці Казахстану. Паводле турыстаў, у іх запатрабавалі 200 тыс. тэньге за адсутнасць казахстанскага тэхагляду і траплянне на камеру. Пры гэтым яны кажуць, што нічога не парушалі і доказаў ім не далі.
«Мы супраціўляцца асабліва не сталі. Проста заплацілі і паехалі далей», – адзначыў беларус.
Выданне NUR.KZ адзначае, што ў дарожнай паліцыі Туркестанскай вобласці заявілі, што праводзяць правяранне гэтага факту. Там адзначылі, што «афіцыйных заяваў ад магчымых пацярпелых не паступала, рэгістрацыйныя звесткі транспартнага сродку таксама не выяўленыя».
У ведамстве адзначылі, што пачатая крымінальная справа, а ў дачыненні кіраўніцтва адпаведнага падраздзялення пачатае службовае расследаванне.
,,«Вінаватыя панясуць пакаранне ў адпаведнасці з законам. З мэтай недапушчэння гэткіх выпадкаў узмоцнены кантроль за працаю патрульных нарадаў. Ачышчэнне шэрагаў і барацьба з праявамі карупцыі застаюцца прыярытэтамі ў працы Міністэрства», – сказалі ў дарожнай паліцыі.
Там таксама падзякавалі грамадзянам за актыўную грамадзянскую пазіцыю і адкрытасць «да канструктыўнага дыялогу».
Якуб Хруст belsat.eu
![Кадр з фільма. Фота: скрыншот з відэа [TNO/OTL] Custom Super Events Belarus | Post-Lukashenko / YouTube](https://s2.tvp.pl/images2/b/3/5/uid_b358422349bd4808bc86d47cb7901563_width_499_play_0_pos_0_gs_0_height_280.png)
