Нацыянальнае агенцтва вышуку і менеджменту актываў Украіны (АРМА) зрэалізавала чарговую партыю хларыду калію, што належаў «Беларуськалію». Агулам за месяц быў прададзены 161 вагон з беларускімі ўгнаеннямі.
Як заявілі ў агенцтве, было прададзена 3524 тоны хларыду калію ў 50 чыгуначных вагонах. Выніковая сума рэалізацыі склала 39,8 млн грыўняў (каля $ 950 тыс.) разам з мытнымі платамі на 14,7 млн (каля $ 350 тыс.). Гэтыя сродкі будуць накіраваныя ў тым ліку на куплю вайсковых аблігацыяў з мэтай падтрымання сілаў абароны Украіны.
28 сакавіка АРМА зрэалізавала іншую партыю з 50 вагонаў беларускага калію аб'ёмам 3469 тон за 36,7 млн грыўняў (каля $ 880 тыс.), а 3 сакавіка – 61 вагон беларускага калію за 45,5 млн (каля $ 1,09 млн).
У Мінюсце Украіны адзначаюць, што «Беларуськалій» ёсць галоўным дзяржаўным вытворцам калійных угнаенняў і адным з найбуйнейшых падаткаплатнікаў у бюджэт Беларусі, цалкам кантраляваным уладамі краіны, «у тым ліку – непасрэдна самаабвешчаным прэзідэнтам Аляксандрам Лукашэнкам».
У ведамстве падкрэсліваюць, што кампанія сваімі дзеяннямі спрыяе вядзенню вайны супраць Украіны праз фінансава-гаспадарчыя стасункі з прадпрыемствамі вайскова-прамысловага комплексу Расеі і акупацыйнымі адміністрацыямі самаабвешчаных ДНР і ЛНР. Таксама «Беларуськалій» даваў транспарт для перавозу і памяшканні для перабывання ўкраінскіх дзяцей, вывезеных з акупаваных тэрыторыяў у Беларусь, і ўдзельнічаў у арганізацыі ды фінансаванні імпрэзаў, звязаных з падтрыманнем палітыкі «дзяржавы-агрэсара ў непрызнанні права ўкраінскага народу на самаідэнтыфікацыю».
Якуб Хруст belsat.eu
