Кіраўнік фонду «BYSOL» Андрэй Стрыжак 1 красавіка пракаментаваў магчымасць эвакуацыі з Беларусі прарасейскай актывісткі і даносчыцы Вольгі Бондаравай, якая цяпер сама адбывае пакаранне за «распаўсюд экстрэмісцкіх матэрыялаў».
Андрэй Стрыжак адзначыў у Facebook, што заяўка даносчыцы не была б адхіленая аўтаматычна.
«На першым этапе мы б упэўніліся што гэта насамрэч яна (маем сродкі верыфікацыі) і потым бы запусцілі працэдуру. У межах працэдуры вызначаюцца суадносіны пакарання, што пагражае чалавеку, і патэнцыйная шкода/карысць для грамадства і краіны прымання, што можа прынесці былы прапагандыст/сілавік. Гэты аналіз адбываецца ў шчыльнай супрацы з краінамі, куды чалавек можа трапіць дзякуючы нашаму ўмяшанню», – заявіў ён.
У Беларусі праходзяць арышты прарасейскіх актывістаў. Іх караюць соднямі паводле экстрэмісцкіх артыкулаў. Самую заўважную прарасейскую актывістку ў Беларусі Вольгу Бондараву пакаралі соднямі за «распаўсюд экстрэмісцкіх матэрыялаў» 26 сакавіка. 31 сакавіка стала вядома, што арыштаваны таксама за распаўсюд экстрэмізму паплечнік іншай расейскамірскай актывісткі Эльвіры Мірсалімавай, Сяргей Лашкоў. Сама Мірсалімава была арыштаваная на двое содняў у траўні 2024 года. Муж Вольгі Бондаравай у размове з блогерам Андрэем Павуком адзначыў, што «шчымяць усіх», маючы на ўвазе людзей, чые погляды блізкія да поглядаў ягонай жонкі.
Якуб Хруст belsat.eu
