У Маладзечне 31 сакавіка затрымалі грамадзяніна ЗША, якога знайшлі ў парожнім вагоне цягніка. Гэта адбылося неўзабаве пасля гібелі трох амерыканскіх вайскоўцаў і знікнення яшчэ аднаго ў суседняй Літве.
Парушальніка мяжы – 27-гадовага мужчыну – на чыгуначнай станцыі знайшлі менскія мытнікі. Ён ехаў з Літвы ў адным з парожніх вагонаў чыгуначнага саставу Кяна – Маладзечна. Амерыканца аператыўна затрымалі і перадалі органам памежнай службы, паведамілі ў Дзяржаўным мытным камітэце.
Інцыдэнт адбыўся неўзабаве пасля таго, як каля беларускай мяжы загінулі тры амерыканскія вайскоўцы, а яшчэ адзін знік без вестак. Нагадаем, што амерыканскія вайскоўцы ў гусенічнай браняванай машыне M88 зніклі 25 сакавіка падчас вучэнняў на палігоне ў Падброддзі. Наступным днём стала вядома, што машына затанула ў балоце. Яе лакацыю вызначылі ў сераду, пасля чаго пачалася складаная аперацыя пад’ёму. Браняваная машына была на глыбіні 4 метраў, над ёю было 2 метры глею. У нядзелю ўвечары амерыканскія вадалазы здолелі замацаваць на ёй тросы.
Раніцаю 31 сакавіка на палігоне ў Падброддзі ратавальнікам удалося дастаць з балота машыну. Пры гэтым у ёй былі знойдзеныя целы толькі трох з чатырох зніклых вайскоўцаў. Ягоныя пошукі працягваюцца.
Начальнік штабу абароны Збройных сілаў Літвы, генерал-лейтэнант Рэмігіюс Балтрэнас расказаў LRT, што для пошуку выкарыстоўваюцца гідралакатары і беспілотнікі. Пошукі працягваліся ўсю ноч, але вынікаў не далі. «Наша Ніва» адзначае, што век знойдзенага ў Беларусі 27-гадовага амерыканца падобны да таго, што мае зніклы 28-гадовы вайсковец ЗША Трой Колінз, але супадзенне не дакладнае.
Якуб Хруст belsat.eu
