Беларускі рэжым рыхтуецца да перамоваў з Расеяй пра будаўніцтва другой атамнай электрастанцыі. Пра гэта 31 сакавіка заявіў новы міністр энергетыкі Дзяніс Мароз.
Паводле яго словаў, пытанне ўжо абмяркоўваецца «на самым высокім узроўні», а цяпер пачынаецца падрыхтоўка да тэхнічных перамоваў – пра кошт, параметры і ўмовы рэалізацыі праекту.
Міністэрства энергетыкі плануе ў бліжэйшы час прадставіць даклад аб будаўніцтве другой АЭС Аляксандру Лукашэнку. Сам Мароз называе сваёй задачай «стратэгічнае развіццё энергасістэмы краіны» ў перыяд з 2026 да 2030 года і гаворыць пра неабходнасць павышэння надзейнасці электразабеспячэння.
Ідэя другой АЭС – не навіна. Аляксандр Лукашэнка ўжо неаднаразова ўздымаў яе публічна, даручаў чыноўнікам ацаніць мэтазгоднасць пашырэння Беларускай АЭС у Астраўцы або будаўніцтва новага ядзернага аб’екту.
Нагадаем, для будаўніцтва другой АЭС у Беларусі Лукашэнка разглядае ўсходнія вобласці нашай краіны, на мяжы з Расеяй, каб прадаваць электраэнергію ў Бранскую вобласць, а таксама ў акупаваныя Расеяй украінскія рэгіёны (Лукашэнка назваў іх «новымі рэгіёнамі Расеі»). Пра гэта палітык паведаміў падчас свайго выступу ў Савеце Федэрацыі Расеі 14 сакавіка.
Тады ж Лукашэнка згадаў, што напярэдадні абмяркоўваў з расейскім бокам будаўніцтва другой АЭС у Беларусі і прасіў даць яму дазвол самастойна будаваць усё, акрамя рэактару: маўляў, у Беларусі ёсць спецыялісты.
Першая Беларуская АЭС была збудаваная з удзелам «Расатама» і пераважна на расейскі крэдыт. Першы энергаблок быў уведзены ў эксплуатацыю ў 2020 годзе, другі – у 2023-м. Абодва працуюць паводле расейскага праекту, а экспарт беларускай атамнай электраэнергіі дагэтуль выглядае даволі абмежаваным – з улікам напружаных адносінаў з суседнімі краінамі.
Надзея Вольная / belsat.eu
