У Мастах на Гродзеншчыне завяршаецца рэканструкцыя найдаўжэйшага падвяснога моста Беларусі. Чыноўнікі абяцалі зрабіць яго сапраўднай турыстычнай сенсацыяй: галоўнай фішкай павінен быў стаць 10-мятровы ўчастак шкляной падлогі, праз які можна было б любавацца Нёманам. Але рэальнасць моцна разышлася з прыгожымі абяцаннямі ўладаў.
Абноўлены мост амаль гатовы, але першых наведнікаў, гледзячы па ўсім, чакае непрыемная нечаканасць. Замест 10-мятровага празрыстага ўчастка падлогі з’явіліся некалькі маленькіх кавалачкаў шкла вельмі дрэннай якасці, праз якое рэальна нічога не відаць.
«Ну што гэта за шкло? Ні халеры не відаць таго Нёмана, кропкі нейкія ды ўзоры», – абураецца мужчына на відэа, якое было размешчана ў TikTok. З кантэксту зразумела, што яго запісалі мясцовыя будаўнікі, якія прайшліся па яшчэ не адчыненаму для ўсіх мосту.
«Эх, а такі мост быў»,– з сумам уздыхае чалавек за кадрам.
Ад «Залатых варотаў» да залатых абяцанняў
Падвясны мост у Мастах быў адкрыты яшчэ ў 1972 годзе і стаў адной з самых вядомых славутасцяў Гарадзеншчыны. Асаблівую папулярнасць ён здабыў падчас COVID-19, калі беларусы пачалі актыўна падарожнічаць па краіне. Знакамітыя Краснасельскія мелавыя кар'ерыз бірузовай вадой, якія знаходзяцца недалёка адсюль, яшчэ больш узмацнілі яго вядомасць.
Цікава, што першапачаткова мост моцна разгойдваўся на ветры, што вельмі падабалася аматарам вострых адчуванняў. Але ў 90-х яго ўмацавалі і зрабілі больш стабільным.
Летась мясцовыя чыноўнікі паабяцалі зрабіць новы мост сапраўдным «турыстычным магнітам». Губернатар Гарадзенскай вобласці
Ужо былы кіраўнік Гарадзеншчыны Уладзімір Каранік не шкадавай прыгожых словаў ды абяцанняў і распавядаў пра ўнікальную падсветку і вялікі празрысты шкляны падлогу, якія хутка ўпрыгожаць знакаміты мост і зробяць яго сапраўдным цудам Гарадзеншчыны. Дзяржаўныя СМІ абвяшчалі будучы мост ці не галоўнай турыстычнай славутасцю Беларусі.
«Ні халеры не відаць таго Нёмана!»
Ад убачанага ў TikTok мясцовыя жыхары і госці гораду не стрымліваюць свайго расчаравання:
«Пачалі ў стылі хай-тэк, а скончылі ў стылі хай-так», – іранізуе адзін з каментатараў.
«Я ўжо рэальна паверыў, што будзе будзе нейкае ноў-хаў, а не, гляджу – усе нармальна», – піша іншы.
,,«Адзіны страх, што гэта шкло яшчэ і не вытрымае!»– каментуюць беларусы.
Акрамя таго, людзі звярнулі ўвагу на дзіўнае інжынернае рашэнне: вострыя металічныя куткі для мацавання агароджы размясцілі не звонку, а проста на пешаходнай дарожцы, што стварае відавочную небяспеку:
«І хто падпісваў тэхніку бяспекі? Калі нехта паслізнецца і ўдарыцца галавой?» – пытаецца адзін з каментатараў.
На пытанне, чаму шкло паклалі толькі маленькімі кавалкамі, адзін з будаўнікоў адказаў:
«Каб бабуля, калі пойдзе, не баялася. А так зрабіла пару крокаў – і ўсё».
На што мясцовыя жыхары зноў адрэагавалі:
«Ну так, галоўнае на гэтым мосце – не глядзець уніз. Бо адразу стане зразумела, што нас усіх зноў падманулі».
Надзея Вольная / belsat.eu
