Кіраўнік НАУ Павел Латушка паведаміў «Белсату», што зніклая спікерка Каардынацыйнай рады мела доступ да ягонага календара паездак і сустрэчаў, таму гэтую інфармацыю маглі атрымаць спецслужбы, калі Анжаліка Мельнікава затрыманая ў Беларусі.
Кіраўнік Народнага антыкрызіснага ўпраўлення Павел Латушка першым раскрыў інфармацыю пра знікненне спікеркі Каардынацыйнай рады і заявіў пра гэта ў паліцыю Варшавы.
Паводле польскіх службаў, Анжаліка Мельнікава пакінула тэрыторыю краіны некалькі тыдняў таму.
Надоечы кіраўнік арганізацыі «BYPOL» Аляксандр Азараў сказаў «Белсату», што Мельнікава «ці ў Беларусі, ці хутка там будзе».
«Мы можам паведаміць, што мабільны тэлефон Анжалікі Мельнікавай з 19 сакавіка знаходзіцца на тэрыторыі Беларусі. Гэта выяўлена намі тэхнічным спосабам», – такі допіс з'явіўся 31 сакавіка ў Telegram-канале Латушкі.
Калі версія з выездам актывісткі ў Беларусь пацвердзіцца, то лукашэнкаўскія спецслужбы могуць атрымаць інфармацыю пра запланаваныя паездкі і сустрэчы Паўла Латушкі, паведаміў ён «Белсату»:
,,«Яны, на жаль, маглі атрымаць доступ да календара ўсіх маіх сустрэчаў і паездак, якія адбыліся і якія плануюцца бліжэйшымі месяцамі. Так, гэта можа быць выкарыстана рэжымам супраць мяне асабіста».
Ён адзначыў, што Мельнікава – грамадзянка не толькі Беларусі, але і Польшчы, таму «гэта ў тым ліку атака на Польшчу і на ЕЗ, з якога б боку ні аналізаваць гэтай сітуацыі».
Акрамя таго, Латушка пракаментаваў перабыванне дзяцей Мельнікавай у Беларусі ў 2022 годзе, калі яна ўжо брала ўдзел у палітычным жыцці ў эміграцыі:
«Гэтае пытанне, безумоўна, узнікла, была дадзеная рэкамендацыя вывезці дзяцей, што Анжаліка і зрабіла».
Пры гэтым палітык не ведае, ці наведвалі потым дзеці спадарыні Анжалікі радзіму:
,,«У беларускіх дэмакратычных сілаў няма контрвыведкі, таму мы не можам гэтага пацвярджаць або зняпраўджваць».
23 сакавіка з Польшчы ў Беларусь выехаў былы муж Анжалікі Андрэй Мельнікаў, паведамляў раней Латушка са спасылкаю на польскія службы. Паводле кіраўніка «BYPOL» Азарава, «гэта ні пра што не кажа», бо той «заўсёды ездзіў туды-сюды».
Выданне «Зеркало» сёння напісала, што атрымала паведамленне ад чытача, які сцвярджае, што днямі бачыў спадара Андрэя разам з дочкамі ў Нясвіжы, родным горадзе Анжалікі.
Журналісты пазванілі на нумар, зарэгістраваны на Мельнікава.
«На званок адказаў мужчына, але пасля ўдакладнення, ці гаворыць журналіст з Андрэем Мельнікавым, суразмоўца скончыў гутарку. Пасля гэтага тэлефон абанента перастаў адказваць, а потым яго наогул выключылі», – піша выданне.
Беларускія прапагандысты актыўна распаўсюджваць намёкі на тое, што Мельнікава ў Менску, што яна нібыта агентка спецслужбаў, а на дзяржаўным тэлебачанні ў хуткім часе пакажуць інтэрв'ю з ёю.
Павел Латушка не верыць у версію, што ягоная паплечніца працавала на КДБ.
«Тады гэта ўжо такі высачэзны ўзровень прафесіяналізму беларускіх спецслужбаў, што нават цяжка тут даць нейкія ацэнкі», – сказаў палітык у інтэрв'ю «Еўрарадыё».
Месцазнаходжанне Мельнікавай дакладна не вядомае.
«Польскія службы атрымалі інфармацыю, што прадстаўнікі Каардынацыйнай рады Беларусі ўжо некалькі дзён не маюць кантакту з старшынёю Анжэлікаю Мельнікаваю. Паводле польскіх і партнёрскіх службаў, гэтая асоба ўжо некалькі тыдняў знаходзілася за межамі Польшчы. Польскія службы падтрымаюць дзеянні службаў іншых краінаў і КР Беларусі, каб высветліць месцазнаходжанне спадарыні Мельнікавай», – сказаў «Белсату» прэс-сакратар міністра ўнутраных справаў і адміністравання Польшчы Яцэк Дабжыньскі.
У прэс-службе МЗС Польшчы паведамілі, што трымаюць кантакт з беларускімі дэмакратычнымі сіламі ў гэтай справе:
,,«На ўзроўні Міністэрства ўнутраных справаў і падначаленых службаў трывае адпаведная праца. МЗС не мае новай інфармацыі ў гэтым пытанні, аднак мы падтрымліваем сталую сувязь з прадстаўнікамі беларускай апазіцыі ў Польшчы».
Сцяпан Кубік belsat.eu
