Ірына Абельская, якую лічаць маці Мікалая Лукашэнкі, ужо 16 гадоў кіруе Рэспубліканскім клінічным медычным цэнтрам, які ў народзе называюць лечкамісіяй. Гэтая медустанова падпарадкоўваецца Кіраўніцтву справамі Аляксандра Лукашэнкі і прызначаная для абслугоўвання чыноўнікаў ды набліжаных. «Бюро» даведалася, колькі Абельская зарабляе на сваёй пасадзе.
У 2018 годзе так званая лечкамісія пераехала ў новы будынак у Ждановічах пад Менскам. Будоўля каштавала беларускаму бюджэту 100 мільёнаў долараў. Але бясплатнае абслугоўванне там атрымліваюць выключна чыноўнікі. Звычайныя грамадзяне могуць атрымаць паслугі толькі за грошы.
Паводле прадстаўнікоў медыяпраекту «Белыя халаты», цэнтр афіцыйна лічыцца рэспубліканскім навукова-практычным цэнтрам (РНПЦ). Паводле закону, такія ўстановы павінны займацца складанымі выпадкамі і развіваць медыцынскую навуку, але лечкамісія існуе выключна для патрэбаў чыноўнікаў.
«Сам факт існавання такой установы выклікае пытанні, бо яна створаная не для вырашэння медыцынскіх праблемаў краіны, а для камфортнага жыцця асобнай катэгорыі грамадзянаў», – кажуць «Белыя халаты».
Паводле інфармацыі, якую здабыла рэдакцыя «Бюро», заробак Ірыны Абельскай пастаянна расце. У 2022 годзе яе заробак складаў ад 4,7 да 8,2 тысячы беларускіх рублёў на месяц, за год яна атрымала 81,6 тысячы рублёў. У 2023 годзе гадавы заробак Абельскай ужо дасягнуў 94,7 тысячы рублёў. За дзевяць месяцаў 2024 года ёй налічылі больш за 82 тысячы рублёў, пры стаўцы галоўнага лекара 11,7 тысячы рублёў на месяц.
На думку галоўнага лекара аднаго з беларускіх прыватных медцэнтраў, дырэктары сапраўдных РНПЦ маюць поўнае права на такія заробкі, бо гэта спецыялісты найвышэйшага ўзроўню, навукоўцы і прафесіяналы сусветнага класу.
«Праблема толькі ў тым, што Абельская не адпавядае па ўзроўні сваіх кампетэнцый займанай пасадзе», – падкрэслівае суразмоўца «Белых халатаў».
Надзея Вольная / belsat.eu
