У Францыі суд прызнаў лідарку ўльтраправых Марын Ле Пэн вінаватай у растраце сродкаў Еўрапарламенту і забараніў ёй займаць дзяржаўныя пасады цягам пяці гадоў. Гэтая пастанова ставіць крыж на ўдзеле Ле Пэн у прэзідэнцкіх выбарах 2027 года, на якіх яна лічылася адной з фаварытак.
Як паведамляе «Reuters», суд Парыжу прысудзіў Марын Ле Пэн да чатырох гадоў зняволення, з іх два – умоўна, а таксама аштрафаваў на 100 тысячаў еўраў. Пры гэтым палітычная дзяячка сышла з залі яшчэ да таго, як суддзя скончыў зачытваць вырак.
Справа датычыць фіктыўнага найму памочнікаў дэпутатаў Еўрапарламенту: згодна з матэрыяламі абвінавачання, людзі, якіх афіцыйна ўладкоўвалі як памочнікаў еўрадэпутатаў ад «Нацыянальнага аб’яднання», насамрэч выконвалі заданні асабіста для Ле Пэн ці партыі. Такім чынам, на працягу гадоў з бюджэту ЕЗ маглі быць скрадзеныя мільёны еўраў. Еўрапарламент ацаніў шкоду амаль на 7 млн еўраў.
Агулам у крымінальнай справе фігуруюць 27 чалавек, у тым ліку бацька Марын Жан-Мары Ле Пэн, заснавальнік «Нацыянальнага фронту», а таксама іншыя вядомыя фігуры партыі. Следства мяркуе, што схема фіктыўнага найму зрабілася «сістэмным сродкам фінансавання» партыі ў часы, калі тая перажывала сур'ёзны крызіс і была абцяжараная вялікімі даўгамі.
Нягледзячы на тое, што прысуд яшчэ можа быць абскарджаны і пакуль не набыў поўнай юрыдычнай моцы, забарона на ўдзел у выбарах пачала дзеяць неадкладна паводле так званай меры часовага адбыцця пакарання, якую запытала пракуратура. Калі апеляцыя не будзе задаволеная да 2027 года, Ле Пэн не зможа прэтэндаваць на прэзідэнцтва.
Палітычны выбух
Прысуд выклікаў моцную рэакцыю ў палітычных колах Францыі. Партыя Ле Пэн назвала працэс «паляваннем на ведзьмаў» і «змовай» з мэтай не дапусціць ультраправых да ўлады.
Жорсткі прысуд, паводле экспертаў, яшчэ больш распаліў дыскусію пра тое, як судовая ўлада можа ўплываць на палітычную. У інтэрнэце з'яўляюцца пагрозы на адрас пракурораў і суддзяў, што, паводле «Reuters», ёсць часткай «усё мацнейшай міжнароднай рэакцыі на спробы пакараць палітычныя злачынствы».
Нагадаем, 56-гадовая Ле Пэн тройчы была ў Францыі кандыдаткай на прэзідэнцтва. У 2022 і 2017 гадах яна саступіла Макрону ў другім туры, а ў 2012-м заняла трэцяе месца. Раней Ле Пэн заяўляла, што выбары 2027 года будуць для яе апошняй спробай заняць Элізэйскі палац.
Надзея Вольная / belsat.eu
