Аляксандр Лукашэнка прызначыў Юрыя Караева старшынём Гарадзенскага абласнога выканаўчага камітэту.
Да гэтага прызначэння Юрый Караеў (з сакавіка 2024 года) выконваў абавязкі кіраўніка вобласці пасля таго, як ягоны папярэднік Уладзімір Каранік заняў пасаду віцэ-прэм’ера.
Аляксандр Лукашэнка патлумачыў сваё прызначэнне тым, што Караеў трымае дысцыпліну і парадак, бо «без тэхналагічнай дысцыпліны мы наўрад ці нешта ў Гродзенскай вобласці зможам зрабіць».
«Як складзецца ваша работа ў Гарадзенскай вобласці, паглядзім. Але я ведаю вас як чалавека выканаўчага і дысцыплінаванага. Калі трэба, значыць, трэба, гэта павінна быць зроблена. І вы гэта можаце рабіць. Таму з шэрагу кандыдатур, якія прапаноўваліся, я ўсё ж прыняў рашэнне прызначыць вас губернатарам Гарадзенскай вобласці», – адзначыў Лукашэнка.
Юрый Караеў нарадзіўся ў горадзе Арджанікідзэ (цяпер Уладзікаўказ), атрымаў вайсковую адукацыю ў Саратаўскім ваенным вучылішчы, а пазней – у Ваеннай акадэміі імя Фрунзэ ў Маскве і на факультэце Генеральнага штаба ў Беларусі. Пасля распаду СССР застаўся служыць у Беларусі і працаваў у сістэме ўнутраных войскаў.
Юрый Караеў узначальваў спецназ у Гомлі, Бабруйску, кіраваў спецпадраздзяленнем ГУУС Менгарвыканкама і спецназам унутраных войскаў МУС у Менску.
Знаёмыя з Караевым саслужыўцы характарызавалі яго як жорсткага кіраўніка, «сапраўднага ваяку», які караў падначаленых за найменшыя парушэнні, адпраўляў іх на «губу». Вядома, што ён забараняў салдатам перамяшчацца па адным і ўвёў абавязковае перасоўванне па тэрыторыі часткі выключна страявым крокам.
У 2019 годзе Караеў быў нечакана прызначаны міністрам унутраных спраў замест Ігара Шуневіча. У першыя месяцы сваёй кадэнцыі ён выказваўся за змякчэнне працы міліцыі і адмену «палачнай сістэмы». Аднак менавіта пры ім у 2020 годзе адбываліся масавыя рэпрэсіі супраць мірных пратэстоўцаў пасля прэзідэнцкіх выбараў. За гэта ён быў уключаны ў санкцыйныя спісы ЕЗ, ЗША, Вялікай Брытаніі і іншых краін.
У кастрычніку 2020 года Караеў пакінуў пасаду міністра і быў прызначаны памочнікам Лукашэнкі – інспектарам па Гарадзенскай вобласці. Менавіта тут ён працягнуў сваю кар’еру, спачатку ў якасці куратара рэгіёна, а цяпер ужо як ягоны кіраўнік.
Раман Шавель belsat.eu
