Прэзідэнт Парламенцкай асамблеі Рады Еўропы Тэодорас Русопулёс занепакоены звесткамі пра знікненне спікеркі Каардынацыйнай рады Анжалікі Мельнікавай.
Рэакцыю на знікненне Анжалікі Мельнікавай прэзідэнта ПАРЕ апублікавалі на сайце арганізацыі 29 сакавіка.
«Я глыбока занепакоены знікненнем Анжалікі Мельнікавай, спікеркі Каардынацыйнай рады беларускіх дэмакратычных сілаў, разам з ейнымі дочкамі. Рэжым Лукашэнкі мае даўнюю гісторыю выкарыстання рэпрэсіяў і запалохвання супраць апанентаў, што робіць кожнае такое знікненне справаю надзвычай сур’ёзнай заклапочанасці», – адзначыў Русопулёс.
Ён назваў Анжаліку Мельнікаву «адважнай абаронцай свабоднай і дэмакратычнай Беларусі» і згадаў ейны выступ у пленарнай зале ў студзені 2025 года, дзе яна «адкрыта апавядала пра жорсткасць і рэпрэсіі рэжыму».
,,«Я далучаюся да генеральнага спавяшчальніка ПАРЕ аб дэмакратычнай Беларусі Рышарда Пэтру (Польшча, ALDE) і заклікаю ўсіх, хто валодае інфармацыяй пра месцазнаходжанне Анжалікі Мельнікавай і ейных дочак, неадкладна звязацца з польскімі спецслужбамі», – заявіў Русопулёс.
Нагадаем, што сувязь са спікеркаю Каардынацыйнай рады Анжалікаю Мельнікаваю знікла 25 сакавіка. У звязку з гэтым кіраўнік Народнага антыкрызіснага ўпраўлення Павел Латушка звярнуўся да польскіх праваахоўных органаў з заяваю пра знікненне жанчыны. Вядома, што Мельнікава пакінула тэрыторыю Еўразвязу, імаверна, вылецеўшы ў Вялікую Брытанію. Дзе яна цяпер, невядома.
Раман Шавель belsat.eu
