Прадстаўнік «BYPOL» Аляксандр Азараў сказаў «Белсату», што мае некалькі версіяў знікнення спікеркі Каардынацыйнай рады Анжалікі Мельнікавай. Паводле адной з іх, актывістка ўжо можа быць у Беларусі.
Сувязь з спікеркаю КР Анжалікаю Мельнікаваю знікла 25 сакавіка. Пры гэтым, як паведамілі ў МУС Польшчы, яна пакінула тэрыторыю гэтай краіны яшчэ некалькі тыдняў таму.
Прадстаўнік арганізацыі былых сілавікоў «BYPOL» Аляксандр Азараў сказаў «Белсату», што мае некалькі версіяў знікнення Мельнікавай:
,,«Мы маем версію, што яна ці ў Беларусі, ці хутка там будзе. Гэтая інфармацыя яшчэ спраўджваецца. Другая версія, на якую мы спадзяёмся, што яна ўсё-ткі знойдзецца, проста дзесьці адпачывае і вернецца. Маем версію, як так здарылася, што яна можа апынуцца ў Беларусі, але мы не хочам гэтага апублічваць. Гэтым можна скарыстацца супраць яе, а мы не хочам ёй нашкодзіць».
Суразмоўца «Белсату» пры гэтым раскрытыкаваў тых, хто цяпер абнародуе нейкія падрабязнасці пра працу спікеркі КР. Кажа, гэтым скарыстаюцца спецслужбы:
«Дапусцім, чалавека затрымалі. Яна, можа, штосьці расказала, а штосьці – не. А тут у медыях выходзіць: у яе быў выхад на „Кіберпартызанаў“, яна ўсё там ведае, у яе такія фонды. І спецслужбы толькі сядзяць і запісваюць, што ў яе запытаць. Калі яны раней не ведалі, то цяпер ведаюць. І ўсё гэта цяпер павесяць на Анжаліку, а яна добрая дзяўчына. І шкада яе вельмі».
На пярэчанні, што праца Мельнікавай была публічнаю, як і інфармацыя пра заснаваны ёю ў Польшчы фонд, Азараў адказаў, што ўсё адно «людзям лепей бы памаўчаць»:
,,«Навошта пацвярджаць і даваць падрабязнасці? Шмат лішняй інфармацыі людзі кажуць, якая будзе выкарыстаная супраць яе, калі яна затрыманая. І ёй яшчэ потым на допыце скажуць: глядзі, цябе здалі твае ж сябры і паплечнікі, таму чаго ты сядзіш маўчыш, давай здавай іх. І ўсё гэта ёй пакажуць. Гэта такія метады спецслужбаў. Яе раззлуюць на нас, і яна пачне казаць тое, што яны не ведаюць. Яны ж шмат не ведаюць».
Прадстаўнік «BYPOL» таксама адзначыў, што няма нічога падазронага ў выездзе з Польшчы ў Беларусь былога мужа Анжалікі Андрэя Мельнікава:
«Ён заўсёды ездзіў туды-сюды. Тут няма ніякіх праблемаў, што ён паехаў у Беларусь. Гэта ні пра што не кажа».
Кіраўнік НАУ Павел Латушка са спасылкаю на польскія службы паведамляў, што Мельнікаў мінуў польска-беларускую мяжу 23 сакавіка.
Сцяпан Кубік belsat.eu
