Паліцыя высветліла асобу мужчыны, які параніў нажом пяцёх мінакоў у цэнтры Амстэрдаму 27 сакавіка. Ім аказаўся ўкраінец з Данецкай вобласці. Матывы падазраванага застаюцца невядомымі.
Паліцыя Амстэрдаму паведаміла, што нападніку – 30 гадоў, ён нарадзінец Данецкай вобласці Украіны. Ён цяпер за кратамі. 1 красавіка суд разгледзіць хадайніцтва следчага аб падаўжэнні тэрміну затрымання.
Мужчына, паводле папярэдніх звестак, прыехаў у Амстэрдам 26 сакавіка, тады ён засяліўся ў гатэль. На наступны дзень у цэнтры гораду зламыснік напаў на мінакоў. Ён выкарыстоўваў некалькі нажоў.
Былі параненыя пяць асобаў: мясцовая жыхарка, а таксама грамадзянін Польшчы, жанчына з Бельгіі і двое амерыканцаў. Паляка надоечы выпісалі, астатнія пацярпелыя застаюцца ў шпіталі.
Нападніка спыніў відавочца здарэння, турыст з Вялікай Брытаніі, які ўтрымліваў злачынцу да прыезду паліцыі.
Матывы ўкраінца следства яшчэ высвятляе.
Сцяпан Кубік belsat.eu
