Віцэ-спікерка Каардынацыйнай рады Станіслава Гліннік у размове з «Белсатам» адзначыла, што «не хацела б спекуляваць», аднак сказала, што версіяў знікнення Анжалікі Мельнікавай багата: ад выкрадання і вербавання да дэпрэсіі.
Пасля знікнення Анжалікі Мельнікавай Станіславу Гліннік прызначылі выканальніцаю абавязкаў спікеркі Каардынацыйнай рады.
У размове з «Белсатам» Гліннік расказала, што з Мельнікавай яны не былі сяброўкамі, а асабіста пазнаёміліся толькі падчас выбараў спікера і віцэ-спікера КР:
«Усё-ткі гэта былі прафесійныя стасункі. Мы шмат у чым разыходзіліся і часта дыскутавалі, але мы добра разам працавалі. Анжаліка шмат працы на сябе цягнула, і я намагалася ёй дапамагаць».
Гліннік назвала калегу «вельмі адкрытай і шчырай»:
«Лёгка знаходзіць мову з рознымі людзьмі. У яе былі цудоўныя стасункі з партнёрамі і з чальцамі Каардынацыйнай рады. Яна да ўсіх знаходзіла падыход».
Апошні раз жанчыны размаўлялі 7 сакавіка, а ліставаліся 18-га.
«Сёмага яна не выходзіла на сувязь. Яна не прыйшла на імпрэзу, але ўвечары мне адзванілася, і я даведалася, што ў яе пагоршыўся стан здароўя. У яе быў ковід, але я не ведала, што ён яшчэ працягваецца і яна кепска пачуваецца. І ўжо пасля была інфармацыя, што яна трапіла ў шпіталь», – сказала Гліннік.
Апошняе на гэты момант ліставанне датычыла працоўных момантаў, і суразмоўца мяркуе, што адказвала менавіта Мельнікава, бо пабочная асоба такіх акалічнасцяў не ведала б.
Ад справаў у Каардынацыйнай радзе спікерка адышла ў пачатку лютага:
«Яна ўзяла два тыдні адпачынку. Сказала, што трэба прывесці ў парадак дакументы ейнай арганізацыі, што патрэбны час, каб заняцца бухгалтэрыяй. І ўжо пасля гэтага адпачынку яна захварэла на ковід і больш не вярталася да справы ў КР».
Гліннік запэўнівае, што не ведала пра ад’езд спадарыні Анжалікі з Польшчы:
«Гэта была для мяне навіна. І, шчыра кажучы, мы вельмі мала камунікавалі, каб я нешта заўважыла, бо так сталася, што я проста яе не кранала, бо ведала, што яна хварэе. І яна папрасіла час для сябе. Яна афіцыйна напісала ў КР, каб з усімі пытаннямі звярталіся да мяне. Я раз на тыдзень пыталася, як ейнае здароўе і калі яна да нас вяртаецца. Яна адпісвала, што яшчэ хварэе. Збольшага вось такая была камунікацыя».
Адпаведна, нічога падазронага ў паводзінах Мельнікавай жанчына не заўважыла:
«Рознае ў жыцці бывае. Два тыдні адпачынку – гэта нармальна. Я падумала, што проста супадзенне такое: яна займалася сваймі справамі і пасля захварэла. Людзі цяжка хварэюць на ковід. Пра адпачынак яна папярэдзіла за тыдзень да яго».
Ніхто ў Радзе не ведае, дзе цяпер Мельнікава, дакладна вядома толькі, што яна пакінула тэрыторыю Польшчы: «Хутчэй за ўсё, вылецела ў Вялікую Брытанію. Там яна ці кудысьці яшчэ скіравалася, мы пакуль не ведаем. Трываюць следчыя дзеянні, і мы проста чакаем выніку».
Як сказала суразмоўца «Белсату», усім падаецца, што галоўная версія – «дзеянні рэжыму», аднак надзея на лепшае застаецца:
«Рознае ў жыцці бывае, і ў нас усё яшчэ застаецца надзея, што чалавек проста паехаў у адпачынак, нікому не сказаў і адключыў усе тэлефоны. Мы шчыра спадзяёмся, што яна вернецца і вельмі здзівіцца, што тут адбываецца».
Пры гэтым, пакуль дакладных звестак няма, разглядаюцца ўсе версіі:
,,«І варыянт таго, што яе скралі, і варыянт таго, што яе завербавалі, і варыянт таго, што яна проста не вытрымала ды з'ехала, і варыянт дэпрэсіі. Розныя маюцца версіі, колькі людзей, столькі версіяў. Таму мы стараемся і ўсіх заклікаем прытрымлівацца толькі афіцыйных версіяў: яна знікла разам з дзецьмі, ейны былы муж вярнуўся ў Беларусь».
Вылучаць нейкую прыярытэтную версію Гліннік адмовілася:
«Я б не хацела спекуляваць. Не буду каментаваць, якая версія мне падаецца верагоднаю. Бо я прыслухоўваюся ў гэты момант да тых асобаў, якія з ёю больш працавалі, да ейнай каманды. І я бачу, што ў іх таксама няма адзінай версіі. Я не так добра ведала Анжаліку, каб рабіць нейкія высновы пра тое, што яна магла зрабіць, а што не».
Выканальніца абавязкаў спікеркі КР таксама апавяла пра грант, які мелася атрымаць арганізацыя. Усе перамовы з донарам вяла Мельнікава, і планавалася, што грошы прыйдуць на рахунак заснаванага ёю ў Польшчы фонду, бо ў Рады няма юрыдычнай асобы:
«Мы шукалі падтрымання для офлайн-пасяджэнняў КР, каб мець магчымасць усіх прывезці і праводзіць пасяджэнні, а таксама на працу медыяслужбы. Адзін з донараў усё ж такі пастанавіў падтрымаць – мы ведаем гэта ад Анжалікі. Яна тады напісала, што гэтае фінансаванне пацверджанае, але грошай яшчэ не перавялі».
Акурат у той момант Мельнікава пайшла ў адпачынак, каб «займацца бухгалтэрыяй, яна таксама казала, што ёй трэба падрыхтаваць бухгалтэрыю, каб гэты грант апрацаваць, каб падрыхтаваць дамовы, каб усё было афіцыйна».
Але пакуль невядома, ці паступілі донарскія грошы на рахунак фонду:
«Я напісала донару, які, наколькі нам вядома, грант вылучаў, бо нам трэба даведацца, ці гэтыя грошы ўвогуле былі пераведзеныя. Да рахункаў, вядома ж, мела доступ толькі Анжаліка ў сваёй арганізацыі. Калі нават гэтыя грошы былі пераведзеныя, у нас няма ніякага пацверджання, што іх там няма. Цалкам магчыма, што яны захоўваюцца на рахунках арганізацыі Анжалікі і што ўсё добра з гэтымі грашыма».
У донара запытвалі 100 тысяч еўраў, але, падобна, Радзе вылучылі не ўсю суму: «Заяўку мы падавалі на такую суму. Але, наколькі я памятаю, Анжаліка казала, што ў стоадсоткавым аб'ёме нам гэты праект не падтрымаюць. Таму мне трэба атрымаць адказ ад донараў, увогуле, колькі мы атрымалі».
Станіслава Гліннік пры гэтым абурылася, што ў сітуацыі, калі знікла асоба, так пільна абмяркоўваюцца грошы:
«Мне, шчыра кажучы, увогуле не падабаецца дыскурс, што мы столькі ўвагі надаём у гэтай сітуацыі фінансаванню. Я разумею, што гэта балючая тэма для беларускай грамадскасці. Але ў нас знік чалавек. Мы не ведаем, ці яна жывая. Мы не ведаем, дзе яна, што за сітуацыя, што адбылося. Мне здаецца, што цяпер гэты фінансавы грант для КР – далёка не першаснае заданне, і мяне пужае доля інфармацыі, што датычыць менавіта гэтага ў беларускіх медыях».
Пасля знікнення Мельнікавай Каардынацыйная рада хутка пачала прымаць захады бяспекі. Жанчына мела доступ да вялікага аб'ёму інфармацыі, мела шмат кантактаў і ліставанняў з партнёрамі, з чальцамі КР, з усімі зацікаўленымі бакамі, адзначае Гліннік:
«Першае, што мы зрабілі, – закрывалі доступ да ейных мэйлаў, папярэджвалі ўсіх партнёраў. Я асабіста паўночы пісала ўсёй планеце лісты пра сітуацыю і папярэджвала ўсіх пра тое, што калі вы мелі нейкія камунікацыі з Анжалікай, то цяпер можа быць небяспечная сітуацыя, калі ласка, паклапаціцеся пра сваю бяспеку. Усіх заклікаю: калі ў вас была камунікацыя з Анжалікай, ачысціце дыялогі і паклапаціцеся пра бяспеку інфармацыі, закрыйце доступ да дакументаў, калі быў адкрыты доступ на „Google“-дыску».
У канцы размовы з «Белсатам» Станіслава Гліннік звярнулася наўпрост да Анжалікі Мельнікавай на выпадак, калі яна гэта пабачыць:
,,«Я хачу сказаць, што калі Анжаліка мяне чуе і калі здарылася нешта, што яшчэ можна выправіць, каб яна не баялася і да нас звярнулася: мы знойдзем развязанне».
Сувязі з Мельнікаваю няма з 25 сакавіка. Кіраўнік НАУ Павел Латушка звярнуўся да польскіх праваахоўных органаў з заяваю пра ейнае знікненне.
Кацярына Гардзеева, Сцяпан Кубік belsat.eu
