Прадстаўніца «Кіберпартызанаў» Юліяна Шаметавец паведаміла «Белсату», што арганізацыя атрымлівала фінансавую дапамогу праз кампанію «Białoruś Liberty», якую ўзначальвае зніклая спікерка Каардынацыйнай рады Анжаліка Мельнікава. На рахунках фонду завіслі «некалькі дзясяткаў тысяч долараў», што належаць «Кіберпартызанам».
Анжаліка Мельнікава заснавала фонд «Białoruś Liberty» ў снежні 2022 года. У назіральную раду кампаніі ўвайшла прадстаўніца «Кіберпартызанаў» Юліяна Шаметавец. Яна пацвердзіла «Белсату», што гэты фонд атрымліваў у тым ліку гранты для гэтай ініцыятывы:
,,«Гэта былі фінансы на дапамогу „Кіберпартызанам“. Напрыклад, мы туды атрымліваем грант на развіццё „Партызанскага Тэлеграму“. Атрымлівалі грант на менеджмент і развіццё базаў звестак, аналіз звестак».
Перад тым як знікла Мельнікава, на рахункі «Białoruś Liberty» меўся прыйсці грант для Каардынацыйнай рады. Паводле папярэдняй інфармацыі, донар ухваліў фінансаванне, але дакладна невядома, ці былі ўжо пераведзеныя грошы. Шаметавец кажа, што нічога пра гэта не ведае:
,,«Я не ведаю нічога пра грант для КР, мяне Анжаліка не інфармавала на гэты конт, хаця была павінна».
Паводле Шаметавец, на рахунках фонду завіслі «некалькі дзясяткаў тысяч долараў», што належаць «Кіберпартызанам». Раней усе гранты спраўна перадаваліся:
«Раней аніякіх праблемаў не было, яна вельмі дэталёва, адкрыта і прафесійна вяла нашыя гранты».
Шаметавец таксама канстатавала, што доступ да рахункаў фонду мае толькі Мельнікава, а на пытанне, ці ёсць шанцы ў «Кіберпартызанаў» неяк атрымаюць свае грошы, адказала: «Пакуль з усім разбіраемся».
Апошні раз Анжаліка Мельнікава выходзіла на сувязь 24 сакавіка. У МУС Польшчы заявілі, што на тэрыторыі краіны яе няма ўжо некалькіх тыдняў. Дзе цяпер жанчына, невядома. Пры гэтым, паводле кіраўніка Народнага антыкрызіснага ўпраўлення Паўла Латушкі, былы муж Мельнікавай Андрэй, які таксама жыў у Варшаве, вярнуўся ў Беларусь.
Сцяпан Кубік belsat.eu
