Мастак Дэ Лёс разам з «Белсатам» сочыць за галоўнымі падзеямі, што вызначаюць нашае жыццё ці выклікаюць шырокі рэзананс у грамадстве. Паказваем карыкатуры на найважнейшыя навіны апошніх тыдняў.
Крыптаамбіцыі Лукашэнкі
У Беларусі збіраюцца
будаваць майнінгавыя фермы. Адзначаецца, што праект падтрымаў Аляксандр Лукашэнка. «Белсат» спытаў у экспертаў, навошта беларускія ўлады пачалі гуляць у крыптагульні і што з гэтага можа выйсці.
Прадстаўнік даследчага цэнтру «MD Academicum»
Яраслаў Кот адзначыў у размове з «Белсатам», што асноўны матыў уладаў – выкарыстанне лішкаў электраэнергіі, якія ўтварыліся пасля запуску Беларускай АЭС. Ён заўважае, што першапачатковыя планы Лукашэнкі наконт продажу гэтай энергіі на Захад праваліліся, а кошты на яе ўнутры краіны пайшлі ўверх.
Можам пабачыць паскарэнне росту цэнаў?
Міністэрства антыманапольнага рэгулявання і гандлю падрыхтавала змены ў пастанову, што датычыць дзяржаўнага кантролю за цэнамі. Эканамістка
Настасся Лузгіна назвала прапановы ведамства палавінкавай лібералізацыяй, папярэдзіла, што рост коштаў можа паскорыцца, і не выключыла, што ўлады зноў закруцяць «цэнавыя гайкі».
Дзень Волі дае веру і надзею
Штогод да
Дня Волі 25 сакавіка беларусы ладзяць мітынгі, шэсці, канцэрты і іншыя імпрэзы. Цягам больш як 30 гадоў акцыі праводзіліся ў Менску ды іншых беларускіх гарадах нават тады, калі гэта было вельмі небяспечна. Пасля пачатку масавых рэпрэсіяў у 2020 годзе мітынгі перамясціліся ў замежжа.
Бензін і дызельнае паліва зноў падаражэюць
Цэны на маторнае паліва на АЗС Беларусі
паднімуцца на 2 капейкі з 22 сакавіка. Пра гэта паведамляе «Белнафтахім».
Раней «Белнафтахім» паведамляў, што паступова павысіць цэны на паліва на 16 капеек за літр. Павелічэнне кошту будзе адбывацца кожныя два тыдні. Першае ўжо было 15 сакавіка.
Рыхтаванне да вайны?
З Пастаўшчыны робяць умацаваны раён. Відавочцы
расказалі «Белсату», што ўздоўж дарог сякуць дрэвы ды іншую расліннасць, што перашкаджае агляду. «Трасы цяпер праглядаюцца цалкам», – сцвярджаюць нашыя суразмоўцы. «Зачышчаюць» у тым ліку дарогу Р45, што злучае Полацк з Катлоўкаю на мяжы з Літвой і далей ідзе на Вільню.
Акрамя таго, вайскоўцы «ўсталёўваюць зубы цмока і нешта рыюць», кажуць відавочцы.
Цяпер у Пастаўскім раёне трывае «праверачны збор з прызывам вайсковаабавязаных і з пастаўкаю транспартавых сродкаў тэрытарыяльных войскаў». Паводле Міністэрства абароны, ён прадоўжыцца да 15 красавіка.
Дэ Лёс belsat.eu
