Варшаўскія праваахоўнікі прасачылі за скрадзеным мікрааўтобусам – і знайшлі зброю, грошы, буйную і разнастайную партыю наркотыкаў. Падазраваны – 30-гадовы грамадзянін Беларусі.
Работнікі польскага сталічнага аддзелу барацьбы з аўтамабільнымі злачынствамі атрымалі сігнал пра скрадзены мікрааўтобус «Mercedes Vito» на вуліцах Варшавы, прасачылі за ім – і затрымалі мужчыну з буйною партыяй наркотыкаў, расказвае паліцыя Варшавы.
За мікрааўтобусам прасачылі да раёну Маркі. Там машына спынілася, з яе выйшаў мужчына. Як пабачыў паліцыянтаў, стаў уцякаць, не рэагаваў на каманды сілавікоў. Праз некалькі сотняў метраў яго спынілі. Паліцыянты адзначаюць, што ў час затрымання ён быў вельмі нервовы і вульгарны.
Затрыманы аказаўся 30-гадовым грамадзянін Беларусі. Машына зарэгістраваная ў Польшчы, але з фальшывым VIN-нумарам: на заводзе «Mercedes» такога нумара не было. Высветлілася, што машыну скралі ў лістападзе мінулага года ў Іспаніі.
У машыне знайшлі зброю (мяркуючы з фота, пнеўматычны рэвальвер і штосьці падобнае да штурмавой вінтоўкі «M4»), неназваную суму грошай у злотых і еўрах, розныя дакументы, ключы ад іншых машынаў.
Паліцыя праверыла яшчэ два аўты ў раёне Зомбкі, якімі карыстаўся падазраваны. У адной з машынаў знайшлі больш за 53,5 кг марыхуаны, амаль 15,5 кг амфетаміну і таблетак MDMA агульнаю вагою каля 2,7 кг. У кватэры падазраванага ў Зомбках знайшлі яшчэ больш за 20 кг гашышу.
Затрыманаму выставілі абвінавачванні ў чатырох злачынствах. Ён часова арыштаваны на тры месяцы. Якое пакаранне яму пагражае, не паведамляюць, але толькі за наркотыкі яму можа пагражаць да 10 гадоў пазбаўлення волі.
Алесь Наваборскі belsat.eu
