Сілавікі нібыта ідэнтыфікавалі 260 удзельнікаў акцыяў да Дня Волі за мяжою. Пра гэта паведамляе тэлеграм-канал дзяржпрапаганды. Людзям пагражаюць крымінальнай адказнасцю.
Паведамляецца, што людзі, якіх апазналі сілавікі, былі на акцыях у Беластоку, Познані, Варшаве, Вроцлаве, Вільні, Берліне, Філадэльфіі, Чыкага, Альбэрце і Маямі.
«98 чалавек з іх – прынцыпова новыя аб'екты. Раней на падобных акцыях заўважаныя не былі ці не траплялі ў поле зроку. Мяркуючы з усяго, хутка варта чакаць заяваў СК з нагоды адкрыцця новых крымінальных справаў. Ну а там далей па накатанай – суды, прысуды, канфіскацыя маёмасці і іншыя непрыемнасці», – палохаюць прапагандысты.
Напярэдадні Дня Волі Следчы камітэт Беларусі таксама палохваў людзей адказнасцю і канфіскацыяй маёмасці.
Дзень Волі святкуецца 25 сакавіка, у гадавіну абвяшчэння ў 1918 годзе незалежнасці першай нацыянальнай беларускай дзяржавы – Беларускай Народнай Рэспублікі. Аднак сілавікі трактуюць гэты дзень як нешта дрэннае.
Арсен Рудэнка belsat.eu
