Дабрачынны аўкцыён для продажу гадзінніка старэйшага дарадцы Святланы Ціханоўскай Франка Вячоркі завершаны. Лот адыходзіць бізнесоўцу Аляксандру Куўшынаву, які прапанаваў за яго 5 тысяч долараў.
Умовай удзелу ў аўкцыёне была гатовасць пералічыць данат «на добрую беларускую справу, дапамогу палітвязням, нашым ваярам ва Украіне ці ветэранам», як было пазначана ў абвестцы на старонцы Франка Вячоркі ў «Фэйсбуку».
Якой ініцыятыве ці асобе ахвяруе грошы Аляксандр Куўшынаў, не ведае пакуль нават сам гаспадар гадзінніка.
,,«Пакуль не ведаю. Яшчэ нават не размаўляў з Куўшынавым, – сказаў Вячорка «Белсату». – А чаму б вам яму не напісаць і не запытаць, куды ён накіруе грошы? Бо я дарую гадзіннік, а ён ахвяруе грошы».
Са словаў дарадцы Ціханоўскай, Аляксандр Куўшынаў, каб атрымаць гадзіннік, мусіць падаць дакументальнае пацверджанне пераліку сродкаў.
Мы напісалі Аляксандру Куўшынаву і запыталіся, ці вызначыўся ён ужо, каму пералічыць данат. Апублікуем адказ, як толькі атрымаем яго.
Паводле тэлеграм-каналу, набліжанага да беларускіх сілавікоў, супраць Куўшынава пасля ўдзелу ў аўкцыёне можа быць заведзеная крымінальная справа за фінансаванне экстрэмізму.
«Белсат» звярнуў увагу на дарагі гадзіннік Франка Вячоркі яшчэ летась.
«Мне яго падараваў чалавек, які вельмі шмат спрычыніўся да беларускай справы, займаўся і да 2020 года, і пасля 2020-га адраджэннем беларускіх мясцінаў. Многія яго ведаюць таксама. Ну ён, пабачыўшы, напэўна, што ў мяне няма гадзінніка, проста зняў свой з рукі і сказаў: вось табе, каб хутчэй вярнуцца ў Беларусь», – расказаў Франак Вячорка «Белсату» летась у сакавіку.
Пасля розгаласу летась у жніўні галоўны дарадца Святланы Ціханоўскай паведаміў, што «гадзіннік пайшоў на дабрачынную ініцыятыву, будзе марафон салідарнасці, і там будуць адбывацца аўкцыёны ў падтрыманне палітычных вязняў у Беларусі, і, думаю, там будзе разыграны гадзіннік».
Другі марафон салідарнасці меўся адбыцца летась у кастрычніку, аднак яго адклалі на нявызначаны тэрмін. Такім чынам, і гадзіннік Вячоркі не пайшоў з малатка.
Сёлета ў сярэдзіне сакавіка «Белсат» запытаўся ў палітыка пра лёс гадзінніка.
«Ляжыць у сейфе з іншымі лотамі. Чакае на аўкцыён», – адказаў палітык.
Літаральна праз некалькі дзён пасля размовы, 21 сакавіка, на сваёй старонцы ў «Фэйсбуку» Вячорка напісаў, што аддасць гадзіннік любому, хто ахвяруе найбольшую суму грошай «на добрую беларускую справу».
Аляксандр Куўшынаў – топ-менеджар ІТ-кампаніі «Gurtam». У ліпені 2020 года яго затрымлівалі ў Менску, калі ён ехаў на ровары падаваць скаргу ў ЦВК.
Марыя Міхалевіч belsat.eu
