Абраная прэзідэнтка Беларусі звярнулася да літоўскіх дэпутатаў на пленарным пасяджэнні Сейму. Святлана Ціханоўская падзякавала суседняй краіне за дапамогу рэпрэсаваным і падтрыманне беларускіх арганізацыяў у выгнанні ды заклікала не ізаляваць беларусаў ад свабоднага свету.
Абраная прэзідэнтка, як паведамляецца ў ейным Telegram-канале, ушанавала доўгую гісторыю сяброўства беларусаў і літоўцаў, заклікала і надалей падтрымоўваць беларусаў:
«Падтрымлівайце незалежных журналістаў, праваабаронцаў, культурніцкія і адукацыйныя ініцыятывы. Працягвайце прымаць рэпрэсаваных, палітвязняў, а таксама беларускіх ветэранаў, якія ваявалі за Украіну».
Акрамя таго, Святлана Ціханоўская заклікала Літву не ізаляваць беларусаў:
,,«Прашу вас: ізалюючы рэжым, не будуйце новай жалезнай заслоны! Візы і захаванне пасажырскага руху – усё гэта ўмацоўвае сувязь беларусаў з Еўропаю. Мяжа з Літвою сёння – гэта мяжа са свабодным светам».
Сённяшнюю інаўгурацыю Аляксандра Лукашэнкі лідарка назвала фэйкавай і адзначыла, што гэта марная спроба «перагарнуць старонку» і вярнуць сабе легітымнасць. «Але гэтага не адбудзецца. Беларусы як не прызнавалі дыктатара, так і не прызнаюць», – запэўніла Ціханоўская.
Яна адзначыла, што Лукашэнка мусіць панесці адказнасць за шмат якія ўчынкі:
«Ён мусіць панесці адказнасць за злачынствы: за вайну супраць Украіны, за гібрыдныя атакі супраць Літвы, захоп самалёта. За тэрор супраць беларусаў. І Літва ўжо зрабіла першы крок у гэтым кірунку – летась супраць рэжыму быў пададзены пазоў у Міжнародны крымінальны суд, які мы падтрымліваем».
Ціханоўская падсумавала, што наперадзе чакае доўгі працэс аднаўлення справядлівасці і законнасці. «Мы не ведаем, як і калі наступяць перамены, але мы да іх рыхтуемся і набліжаем гэты момант», – заявіла абраная прэзідэнтка.
Раней сёння Святлана Ціханоўская адкрыла святочныя імпрэзы, прысвечаныя Дню Волі, урачыстым узняццем бел-чырвона-белага сцяга каля Сейму Літвы. Гэтая цырымонія – частка ўшанавання 107-й гадавіны абвяшчэння незалежнасці Беларускай Народнай Рэспублікі.
Да акцыі далучыліся першы віцэ-спікер Сейму Юозас Олякас і дэпутаты парламенту. Распачалася цырымонія хвілінаю маўчання ў памяць пра тых, хто аддаў жыццё за вольную Беларусь.
У прамове Ціханоўская падкрэсліла, што бел-чырвона-белы сцяг стаўся сімвалам надзеі, пратэсту, а галоўнае – нязломнасці беларусаў:
«Бел-чырвона-белы сцяг нарадзіўся разам з нашаю незалежнасцю. І сімвалічна, што яго стваральнік, Клаўдзій Дуж-Душэўскі, жыў тут, у Літве. Як і Пагоню, гэты сцяг не раз спрабавалі забараніць. За яго кідалі ў сталінскія турмы, збівалі і зневажалі. Але беларусы зноў і зноў выносілі яго на вуліцы. І я веру: пакуль лунае наш сцяг, пакуль гучыць беларуская мова, пакуль у нас ёсць такія саюзнікі, як Літва ды іншыя краіны-партнёры, мы вернем сабе незалежнасць і абавязкова даб'ёмся свабоды».
Абраная прэзідэнтка паабяцала, што аднойчы гэты сцяг залунае ў Менску:
«І хоць сёння мы ўздымаем наш сцяг у Вільні, я веру: мы абавязкова зробім гэта зноў, у Менску. І абавязкова гукнём разам: „Жыве Беларусь!“».
Сцяпан Кубік belsat.eu
