Галоўны рэдактар амерыканскага выдання «The Atlantic» Джэфры Гоўлдбэрг выпадкова атрымаў доступ да закрытага чату ў мэсэнджары «Signal», дзе высокапастаўленыя чыноўнікі ЗША абмяркоўвалі планы авіяўдараў па хусітах у Емене. Гэта выклікала сур’ёзныя сумневы ў бяспецы і абмеркаванне магчымага звальнення дарадцы прэзідэнта ЗША ў справе нацыянальнай бяспекі Майкла Ўолца, які адказваў за стварэнне чату.
Нечаканае запрашэнне ў закрыты чат
11 сакавіка 2025 года Джэфры Гоўлдбэрг атрымаў запрашэнне ў «Signal» ад карыстальніка, які назваўся Майкам Ўолцам, дарадцам прэзідэнта ЗША ў нацыянальнай бяспецы, паведамляе радыё «Свабода». Праз некалькі дзён яго дадалі ў закрытую групу пад назвай «Houthi PC small group», дзе ўдзельнічалі высокапастаўленыя чыноўнікі, у тым ліку міністр абароны Піт Гэгсэт, дзяржаўны сакратар Маркаў Руб’ёў і віцэ-прэзідэнт Джэй Ды Вэнс.
Абмеркаванне вайсковых аперацыяў
У гэтым чаце абмяркоўваліся планы ўдараў па хусітах у Емене. Віцэ-прэзідэнт Джэй Ды Вэнс выступаў супраць неадкладных бамбаванняў і прапаноўваў іх адтэрмінаваць. Міністр абароны Піт Гэгсэт адмаўляў, што ў чаце абмяркоўваліся вайсковыя планы, але ўскосна пацвердзіў прысутнасць Гоўлдбэрга ў групе, назваўшы яго «хлуслівым і вельмі дыскрэдытаваным так званым журналістам».
Рэакцыя Белага дому і магчымыя наступствы
Прэс-сакратар Рады нацыянальнай бяспекі ЗША Браян Г’юз пацвердзіў сапраўднасць ліставання і паведаміў, што адміністрацыя вывучае, як нумар Гоўлдбэрга апынуўся ў закрытым чаце. Прэзідэнт Доналд Трамп заявіў, што не ў курсе інцыдэнту, але выказаў негатыўнае стаўленне да «The Atlantic», назваўшы яго «часопісам, які вось-вось зачыніцца».
Некаторыя чыноўнікі выказалі занепакоенасць магчымым неналежным абыходжаннем з сакрэтнай інфармацыяй. Адзін з высокапастаўленых чыноўнікаў назваў інцыдэнт «кашмарам аператыўнай бяспекі» і выказаў асцярогі, што гэтым могуць скарыстацца спецслужбы Кітаю і Расеі.
У Кангрэсе дэмакраты заклікалі да двухпартыйнага расследавання, каб высветліць, ці не ствараў выцек пагрозы нацыянальнай бяспецы ЗША. Кангрэсмен-ветэран Пэт Раян запатрабаваў тэрміновых слуханняў, заявіўшы: «Калі рэспубліканцы не правядуць расследавання, я зраблю гэта сам».
Чыноўнікі Пэнтагону таксама выказалі здзіўленне тым, што важныя абмеркаванні вяліся ў «Signal». Адзін з іх назваў сітуацыю «неймавернаю», іншы заявіў, што гэта або правал кібербяспекі, або прыкмета нядбаласці міністра абароны.
На фоне інцыдэнту з'явіліся чуткі пра магчымую адстаўку Майкла Ўолца. Некаторыя чыноўнікі настойваюць на ягоным неадкладным звальненні, каб пазбегчы шкоды рэпутацыі прэзідэнта. Аднак прэс-сакратарка Белага дому Кэралайн Лэвіт заявіла, што прэзідэнт цалкам падтрымлівае сваю каманду ў справе нацыянальнай бяспекі.
Інцыдэнт выклікаў шырокі рэзананс у медыях і палітычных колах, падкрэсліваючы важнасць пільнавання пратаколаў бяспекі пры абмеркаванні сакрэтнай інфармацыі.
Надзея Вольная belsat.eu
