Прэзідэнт ЗША Доналд Трамп 24 сакавіка выказаўся адносна перамоваў пра магчымае перамір’е падчас вайны Расеі з Украінай.
Палітык сказаў, што чакае хуткага падпісання амерыкана-ўкраінскага пагаднення аб размеркаванні даходаў ад здабычы найважнейшых карысных выкапняў на Украіне. Доналд Трамп таксама паведаміў, што Злучаныя Штаты абмяркоўваюць з Украінай патэнцыял амерыканскіх кампаній, якія валодаюць украінскімі электрастанцыямі, піша «Reuters».
«Цяпер мы гаворым пра тэрыторыю. Мы гаворым пра дэмаркацыйныя лініі, пра ўладу, пра ўласнасць на электрастанцыі. Некаторыя людзі кажуць, што [Запарожская атамная] электрастанцыя павінна належаць Злучаным Штатам… бо ў нас ёсць досвед», – сказаў ён.
Замірэнне блізкае як ніколі?
Кіраўніца прэс-службы Дзярждэпартаменту Тэмі Брус, выступаючы на брыфінгу для журналістаў 24 сакавіка, адзначыла, што Расея і Украіна блізкія да поўнага спынення агню.
,,«Мы блізкія да гэтага, вось што цікава. Мы ніколі не былі бліжэйшымі, чым цяпер, да поўнага спынення агню», – заявіла яна.
Паводле яе, цяпер Вашынгтон працуе з Масквой і Кіевам над спыненнем агню ў Чорным моры, пасля чаго бакі змогуць пачаць абмяркоўваць далейшыя пытанні. Брус адзначыла, што ЗША хочуць «поўнага аднаўлення мірнай камерцыйнай дзейнасці» ў Чорным моры.
Адносна патэнцыйнага мірнага пагаднення Брус сказала, што «абодвум бакам давядзецца ісці на кампрамісы».
Дэлегацыя ЗША сустрэлася з украінскімі афіцыйнымі асобамі ў нядзелю і з расейскімі афіцыйнымі асобамі ў панядзелак у Эр-Рыядзе (Саудаўская Аравія). Перамовы былі сканцэнтраваны ў асноўным на спыненні агню ў Чорным моры, але Трамп сказаў, што ўзнікаюць і іншыя пытанні, паколькі ён настойвае на спыненні трохгадовай вайны Расеі супраць Украіны.
Міністр абароны Рустэм Умераў, які ўваходзіў ва ўкраінскую дэлегацыю, па выніках перамоваў паведаміў, што размова з амерыканскай дэлегацыяй была «канструктыўнай і змястоўнай», не ўдаючыся ў дэталі.
Якуб Хруст belsat.eu
