Старшыня Рады БНР павіншавала беларусаў з гадавінай абвяшчэння незалежнасці БНР, але нагадала пра абавязак зберагчы тую незалежнасць.
Яшчэ калі ў снежні 1917 года беларусы збіраліся на І Усебеларускі кангрэс, утварылася Рада, якая з абвяшчэннем Беларускай Народнай Рэспублікі 9 сакавіка 1918 года сталася Радай БНР – найвышэйшым кіраўнічым органам першай беларускай рэспублікі. З 1919 года Рада БНР дзейнічае ў выгнанні – яе нярэдка называюць найстарэйшым дзейным урадам у выгнанні.
Старшыня Рады БНР Івонка Сурвіла запісала вітанне беларусаў з Днём Волі. 25 сакавіка 1918 года яна назвала найважнейшаю датаю сучаснай гісторыі Беларусі: тады беларускі народ абвясціў незалежнасць і волю сваёй дзяржавы, Беларускай Народнай Рэспублікі.
«Хаця мы не змаглі тады абараніць нашую незалежнасць, абвяшчэнне Беларусі суверэннай дзяржавай змусіла бальшавікоў стварыць БССР, а існаванне БССР дазволіла беларусам у 1991 годзе абвясціць незалежную Рэспубліку Беларусь», – кажа Сурвіла.
,,«Абавязкам кожнага беларуса ёсць сёння зберагчы гэтую незалежнасць».
«Нягледзячы, на жаль, на падзеі 2020 года і на нашую дзейнасць у свеце, сусветныя СМІ ўсё часцей забываюцца пра нашае існаванне, асабліва калі гавораць пра вайну ва Украіне. Дарагія мае суродзічы, не давайце ім забывацца!
Гэтак жа, як Канада з’ядналася, як ніколі, каб бараніцца ад пагрозаў свайго паўднёвага суседа, як яднаюцца ўсе народы, калі адчуваюць патрэбу бараніць свае інтарэсы, прыйшоў час усім нам адчуць як ніколі прыналежнасць да нашае зямлі і наш абавязак бараніць яе ад усіх захопнікаў, як ворагаў, гэтак і невукаў, якія за 34 гады яшчэ не ўцямілі, што ў цэнтры Еўропы жыве суверэнная нацыя, якая мае такія самыя правы на існаванне, як і яны.
У гэты час, калі ў Беларусі наш народ пад ботам тырана, звяртаюся да беларусаў замежжа, якім ніхто не забараняе прадаўжаць змаганне за волю і лепшую долю нашага народу: карыстайцеся кожнай нагодай, каб прыцягваць увагу палітыкаў і грамадзянаў краінаў, якія вам далі прытулак, што ў цэнтры Еўропы не адзін, а два народы цярпяць ад маскоўскага імперыялізму. І што Беларусі ніхто не памог, калі яна намагалася вызваліцца ў 2020 годзе».
,,«25 сакавіка зноў пакажыце свету, што вы маеце права быць вольным народам на сваёй вольнай зямлі!»
«Дык памажы нам, Божа! Жыве Беларусь!»
Шмат акцыяў за межамі Беларусі, прымеркаваных да Дня Волі, ужо прайшлі на мінулых выходных. Але і на 25 сакавіка, і на наступныя дні запланавана нямала акцыяў за межамі Беларусі. Анонсы акцыяў «Белсат» сабраў тут.
Алесь Наваборскі belsat.eu
