У Польшчы правялі апытанне таго, як мясцовыя жыхары ставяцца да іншых нацыянальнасцяў. Беларусы апынуліся ў канцы спісу.
Паводле апытання, праведзенага «Statista» ў студзені 2025 года, да беларусаў з сімпатыяй ставяцца толькі 20 % палякаў. А вось негатыўна – ажно 48 %.
Тым не менш, гэта нашмат лепш за стаўленне да расейцаў – 8 % да іх ставяцца станоўча, а 72 % – адмоўна.
Беларусы ў Польшчы паводле стаўлення да іх палякаў блізкія да палестынцаў і цыганаў: сімпатыю да іх маюць адпаведна 22 % і 18 % апытаных, антыпатыю – 34 % і 43 %.
Да ўкраінцаў станоўча ставяцца 30 % палякаў, а негатыўна – 38 %.
Найлепш палякі ставяцца да тых народаў, з якімі не мяжуюць: італьянцаў (да іх маюць сімпатыю 60 % апытаных), амерыканцаў (58 %) і іспанцаў (55 %).
Колькасць грамадзянаў Беларусі з афіцыйнымі дазволамі на пражыванне ў Польшчы дасягнула 143 тысячаў, а агульная колькасць беларусаў у краіне можа перавышаць 350 тысячаў. За апошнія пяць гадоў міграцыя беларусаў у Польшчу значна вырасла, асабліва пасля 2020 года. Для параўнання, у канцы 2023 года ў краіне пражывалі амаль 119 тысяч беларусаў з афіцыйным прававым статусам, а ў жніўні 2020 года – толькі 28 тысяч.
Якуб Хруст belsat.eu
