Нацбанк вызначыў курсы валютаў на 25 сакавіка: долар і юань крыху патаннелі, еўра і расейскі рубель – умацаваліся. Эканамістка Настасся Лузгіна растлумачыла «Белсату», што ўплывае на курс беларускага рубля і на што звяртаць увагу тым, хто прызвычаіўся захоўваць ашчаджэнні ў валюце.
Заўтра, паводле курсу Нацбанку, долар будзе каштаваць 3,1314 рубля (мінус 0,0028 рубля ў параўнанні з курсам на сёння), еўра – 3,3976 рубля (плюс 0,0047 рубля), 100 расейскіх рублёў – 3,6558 беларускага (плюс 0,0061 рубля), 10 кітайскіх юаняў – 4,1957 рубля (мінус 0,0313 рубля).
Беларускі рубель у дачыненні да замежных валютаў амаль пазбаўлены суверэнітэту з увагі на моцную залежнасць ад Расеі і рушыць следам за тамтэйшым рублём.
«Ваганні беларускага рубля да замежных валютаў збольшага абумоўленыя сітуацыяй на расейскім валютным рынку. Беларускі рубель не цалкам капіюе дынаміку расейскага, але паўтарае трэнд», – адзначыла ў каментары «Белсату» эканамістка даследчага цэнтру BEROC Настасся Лузгіна.
Істотных змяненняў у курсах на заўтра не адбылося, чаго не скажаш пра дынаміку за мінулы месяц. Беларускі рубель шпарка рос да долара і еўра разам з расейскім «калегам».
«Гэта звязана, з аднаго боку, уласна з эканамічнымі чыннікамі: у Расеі палепшылася сітуацыя з вонкавымі гандлем, гэта паўплывала на дынаміку расейскага рубля ў бок яго ўмацавання», – кажа адмыслоўца.
Пры гэтым, паводле яе, бліжэйшым часам менавіта эканамічныя чыннікі, у тым ліку скарачэнне расейскага экспарту з адначасовым ростам імпарту, могуць прывесці да падзення расейскага рубля, а разам з ім – і беларускага:
,,«У бліжэйшыя месяцы імаверна пэўнае пагаршэнне сітуацыі ў гэтым кірунку, калі будзе больш актыўная дынаміка ў імпарце і ў залежнасці ад кошту энерганосьбітаў – як будзе паступаць валюта ад экспарту. У гэтым выпадку расейскі рубель можа развярнуцца ў бок зніжэння».
Акрамя таго, на курсы валютаў уплывае палітыка:
«Істотную ролю цяпер адыгрываюць перамовы паміж ЗША, Украінаю і Расеяй. Безумоўна, гэта ў пэўнай ступені ўплывае на дынаміку расейскага рубля. Калі прагнозы станоўчыя, інвестары гэта добра ўспрымаюць, і рубель умацоўваецца, што мы і бачылі. Калі чаканні зробяцца негатыўнымі, імаверная дынаміка ў бок зніжэння расейскага рубля».
Цяпер долар і еўра знаходзяцца на мінімумах за доўгі час, і тым, хто прызвычаіўся адкладаць ашчаджэнні ў валюце, варта падумаць наконт пакупкі. Галоўнае – не мітусіцца, а глядзець на курсы ў дынаміцы, і памятаць, што курс можа вагацца як у адзін, гэтак і ў іншы бок:
«Трэба разумець, што рэзкага развароту і рэзкага падзення курсу беларускага рубля наўрад ці будзе. Таму варта глядзець на трэнд. Напрыклад, мы бачым, што цягам тыдня курс развярнуўся і пачынае зніжацца, тады, магчыма, мае сэнс прыглядзецца, калі ёсць патрэба ў набыцці валюты. Варта глядзець кароткатэрміновую дынаміку і прымаць інвестыцыйныя рашэнні».
Лузгіна падкрэсліла, што ў гэтым пытанні заўсёды маецца час на роздум.
«Цягам аднаго – двух дзён не будзе рэзкіх скачкоў, толькі калі ў свеце не адбудзецца штосьці катастрафічнае. Таму ў любым выпадку будзе час для разважанай пастановы ў выпадку неабходнасці пакупкі валюты», – падсумавала суразмоўніца «Белсату».
Сцяпан Кубік belsat.eu
