З 24 сакавіка Генеральнае консульства Расеі ў Горадні прымае наведвальнікаў па новым адрасе – вуліца Гараднічанская, 40. Гэты будынак раней належаў ліквідаванай уладамі ў 2022 годзе арганізацыі польскай меншасці «Польска Мацеж Школьна».
Пра магчымы пераезд консульства ў гэты будынак яшчэ 19 сакавіка паведаміла «Wirtualna Białoruś» са спасылкай на свае крыніцы, піша выданне «Зеркало».
Раней тут размяшчалася адна з найстарэйшых польскіх арганізацыяў у Беларусі – «Польска Мацеж Школьна», якая існавала з 1995 года. У гэтым будынку працаваў грамадскі ліцэй імя Элізы Ажэшкі, дзе вывучалі польскую мову, гісторыю і культуру. Ліцэй лічыўся найбуйнейшай польскай грамадскай школай у свеце паводле колькасці вучняў. Акрамя таго, пры арганізацыі працавалі бібліятэка, універсітэт трэцяга веку для пажылых людзей, жаночы клуб «Граднянка» і іншыя адукацыйныя і культурныя ініцыятывы.
Рэпрэсіі супраць «Польскай Мацежы Школьнай» пачаліся ў 2021 годзе. Арганізацыю абвінавацілі ў незаконнай адукацыйнай дзейнасці, выпісалі штраф памерам 300 тысяч рублёў, а затым падатковая налічыла яшчэ 500 тысяч рублёў нібыта недаплачаных падаткаў. Нягледзячы на спробы зарэгістраваць новую юрыдычную асобу і выплаты штрафаў, у 2022 годзе арганізацыю ліквідавалі.
У 2023 годзе будынак набыў новы ўласнік. Паводле Hrodna.life, першапачатковым пакупніком была група кампаніяў «Спектр», але пазней будынак перайшоў іншым уладальнікам. Пасля гэтага на тэрыторыі з’явіліся элементы ахоўнай інфраструктуры, характэрныя для консульства: будка аховы, плот і сістэма відэаназірання.
Раман Шавель belsat.eu
