Нешта можна прывезці без дакументаў, але большасць – з дакументамі ці ўвогуле пад забаронай.
Без суправаджэння фітасанітарных сертыфікатаў можна прывезці ў Беларусь «прадукцыю высокай фітасанітарнай рызыкі» агульнай вагой не больш за 5 кг, а таксама дыні, кавуны, гарбузы ў колькасці не больш за адну штуку, зрэзаныя кветкі ў колькасці не больш за тры букеты.
Да прадукцыі высокай фітасанітарнай рызыкі адносяцца гародніна (памідоры, агуркі, баклажаны, кабачкі і г. д.), садавіна (яблыкі, абрыкосы, грушы, кавуны, дыні, персікі і інш.), грыбы (і культываваныя, і дзікарослыя), зеляніна.
А вось пры ўвозе ўсіх астатніх раслінаў трэба перасякаць мытню праз чырвоны калідор, дэклараваць тавар і праходзіць каранцінны, фітасанітарны і мытны кантроль.
Фітасанітарныя сертыфікаты выдаюць спецыяльныя органы для каранціну раслінаў краіны-экспарцёра (рээкспарцёра), незалежна ад вагі тавару.
Але ўсё гэта не датычыць прывозу раслінаў з краінаў Еўразвязу: пасля папаўнення спісу санкцыйных прадуктаў (Дадаткі XVIII і XXV ад 29 чэрвеня 2024 года) летам мінулага года туды трапілі амаль усе расліны, кветкі, насенне, карэнні і саджанцы.
Тэса Анэйда / belsat.eu
