Шматтысячныя пратэсты ў Паўночнай Македоніі і Турцыі. Фатаграфіі тыдня

22.03.2025, 01:09

Македонец Драгі Стаянаў плача, трымаючы здымак сына Томчэ – адной з ахвяраў пажару ў начным клубе, у выніку якога, паводле апошніх звестак, загінулі 59 чалавек, а 155 атрымалі траўмы. Сярод загінулых было шмат падлеткаў. Тысячы людзей выйшлі на акцыю пратэсту ў горадзе Кочані, абвінавачваючы ўлады ў карупцыі і патрабуючы справядлівага расследавання трагедыі. Кочані, Паўночная Македонія. 17 сакавіка 2025 года. Фота: Armin Durgut / AP Photo / East News

podpis źródła zdjęcia

Шматтысячныя пратэсты ў Паўночнай Македоніі пасля пажару ў начным клубе, што забраў жыцці 59 асобаў, стыхійныя дэманстрацыі ў Турцыі праз затрыманне мэра Стамбулу, эвакуацыя жыхароў сектару Газа ў выніку аднаўлення ізраільскіх авіяўдараў і наземнай аперацыі Цагалю, 58-ы абмен ваеннапалоннымі паміж Расеяй і Украінай – сабралі галоўныя здымкі тыдня ў падборцы.

Студэнты выкрыкваюць лозунгі падчас акцыі пратэсту супраць перагляду вайсковага заканадаўства перад будынкам Палаты прадстаўнікоў у Джакарце. Парламент краіны прыняў закон, які пашырае ролю вайскоўцаў ва ўрадзе, дазваляючы ім займаць дзяржаўныя пасады без неабходнасці папярэдняй адстаўкі або звальнення з узброеных сілаў, нягледзячы на крытыку грамадства. Джакарта, Інданезія. 20 сакавіка 2025 года. Фота: Aditya Irawan / NurPhoto via AFP / East News.

Крытыкі папярэджваюць, што гэты крок можа вярнуць Інданезію да змрочнага часу вайсковай дыктатуры Сухарта, што трывала 32 гады, пакуль ён не быў вымушаны пакінуць сваю пасаду ў 1998-м.